Prezıdent janyndaǵy QSZI dırektory jas sarapshylarmen kezdesti

ASTANA. QazAqparat – QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov «Qazaqstannyń bolashaq kelbeti» jas sarapshylardy qoldaý baǵdarlamasynyń qatysýshylarymen kezdesti, dep habarlaıdy QazAqparat tilshisi.

«Búginde álemde eń úlken báselestik aqsha úshin emes, talantty, daryndy jastar úshin júrip jatyr. Daryndy jastar úshin kúresý kerek ekendigi de túsinikti. Biz memlekettiń, Prezıdent Ákimshiliginiń kómegimen birneshe jyldan beri sarapshylar mektebin uıymdastyryp kelemiz. Ol júıeli túrde júrgizile beredi dep senemin. Óıtkeni, saraptama jazýǵa ǵana úıretip qoımaı, 1 mln teńge somasynda granttyq kómek te kórsetemiz», - dedi Erkin Tuqymov.

Baǵdarlama qatysýshysy, L.Gýmılev atyndaǵy Eýrazııa ulttyq ýnıversıtetiniń PhD doktoranty Áıgerim Baqtııarova QSZI-diń sarapshylar mektebine kelip, bilimin jetildirip júrgenine 1 aı bolǵanyn aıtady.

«Osy bir aıdyń ishinde elimizdiń bilikti mamandarynan tálim, dáris aldyq. Daǵdymyzdy shyńdaı tústik. Qazirgi ýaqytta Qazaqstan úshin ózekti birqatar baǵytty toptap, zertteý júrgizip jatyrmyz. Onyń ishinde elimizdiń áleýmettik máseleleri, halyqaralyq qatynastardaǵy róli, ımıdji syndy taqyryptar bar», - dedi ol.

Kezdesý barysynda baǵdarlama qatysýshylaryna bilim berý habynyń sertıfıkaty tabystaldy. Іs-sharaǵa Astana, Almaty. Taraz, Semeı qalalarynan kelgen jas sarapshylar qatysty.

Foto: kisi.kz