Prezıdent Jambyl oblysynyń burynǵy basshylarynyń qyzmetine syn aıtty

QORDAI AÝDANY. QazAqparat – Memleket basshysy Jambyl oblysynyń jańa basshylyǵynyń aldyna aımaqtyń ósip-órkendeýin tejeıtin kedergilerdi joıyp, halyqtyń ál-aýqatyn arttyratyn sharalar qabyldaýdy mindettedi, dep habarlaıdy QazAqparat Aqordaǵa silteme jasap.

– Qaqtyǵys bolǵan jerde eshqashan, eshqandaı damý bolmaıdy. Bul – zańdylyq. Ókinishke qaraı, oblys basshylary bul zańdylyqty durys túsingen joq. Sondyqtan oblys basshylary, sonyń ishinde quqyq qorǵaý organdarynyń basshylary tolyǵymen aýystyryldy, qyzmetkerler jumystan bosatyldy. Jańa basshylar taǵaıyndaldy. Solardyń arasynda Berdibek Saparbaev bar. Bul azamatty jaqsy tanısyzdar. Tájirıbesi mol memlekettik qyzmetshi. Onyń aldynda turǵan maqsat – turaqsyzdyqqa túrtki bolatyn jaǵdaılardy túbegeıli joıý jáne óńirdiń damýyna serpin berý, – dedi Qasym-Jomart Toqaev.

Búgin QR Prezıdenti Jambyl oblysynyń Qordaı aýdanyndaǵy Qarakemer aýylynyń jurtshylyǵymen kezdesken bolatyn.

Eske sala ketsek, Qordaıdaǵy oqıǵadan keıin Prezıdent birqatar laýazymdy tulǵany qyzmetinen alýdy tapsyrǵan edi. Jambyl oblysy ákiminiń áleýmettik máseleler jónindegi orynbasary, Qordaı aýdanynyń ákimi, Jambyl oblysy Polıtsııa departamentiniń bastyǵy, Qordaı aýdandyq polıtsııa bóliminiń bastyǵy qyzmetinen bosatyldy.

10 aqpanda Jambyl oblysynyń ákimi Asqar Myrzahmetov ótinishimen qyzmetinen ketti. Sol kúni Berdibek Saparbaev osy laýazymǵa taǵaıyndaldy.