Prezıdent úshin ishki máseleler basymdyqqa ıe – Dáýren Abaev Joldaý týraly

NUR-SULTAN. QazAqparat – Memleket basshysy Qasym-Jomart Toqaevtyń halyqqa Joldaýy aýqymdy qoǵamdyq rezonans týdyrdy. Bul pikirdi QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Joldaý sátti jasaldy. Ol jalpy halyqtyń qyzyǵýshylyǵyn oıatyp, aýqymdy qoǵamdyq rezonans týdyrdy. Joldaýdy sarapshylar, BAQ, blogerler talqylap jatyr. Bul óte mańyzdy dep esepteımin. Árıne, Joldaýdyń mazmuny da sheshýshi ról atqardy. Onda qoǵam talqysynda júrgen eń ózekti máseleler qamtyldy. Máselen, mıtıngter týraly zańnamany jetildirý, zeınetaqy aýdarymdaryn qoldaný, zorlyq-zombylyq jazasyn kúsheıtý tapsyrmalary Prezıdenttiń halyqtyń arman-úmitin kórip, estip otyrǵanyn bildiredi», - dedi mınıstr «Habar» arnasyndaǵy «Ashyq dıalog» baǵdarlamasynda.

Onyń aıtýynsha, Prezıdent saılaýaldy baǵdarlamasynda bergen ýádelerin oryndap keledi.

«Prezıdent bilikti dıplomat bola tura, Joldaýynda syrtqy saıasat máselelerin qozǵamady. Kóptegen adamdardy bul tańqaldyrdy. ıAǵnı, Prezıdent úshin ishki máseleler basymdyqqa ıe. Ásirese, azamattardy tolǵandyryp júrgen baspana, ınfraqurylym, salyq, bilim berý máseleleri mańyzdy», - dedi Dáýren Abaev.