Gazet-jýrnaldarymyz ulttyq sana-sezimdi damytý isinde aıryqsha ról atqarady — Prezıdent

ASTANA. KAZINFORM — Aqorda Memleket basshysy Qasym-Jomart Toqaevtyń Ulttyq basylym kúnimen quttyqtaýyn jarııalady.

— Qadirli baspasóz qyzmetkerleri! Sizderdi Ulttyq basylym kúnimen quttyqtaımyn! Bul mereke — elimizdi órkendetý jáne memlekettigimizdi nyǵaıtý jolynda eńbek etip júrgen baspasóz ókilderine degen shynaıy qurmettiń belgisi. Qazaq basylymdary árdaıym halyqtyń úni, tól rýhanııatymyzdyń berik qorǵany sanalǵan. Biz onyń baı tarıhyn, aǵartýshylyq dástúrin maqtan tutamyz. Gazet-jýrnaldarymyz ulttyq sana-sezimdi damytý isinde aıryqsha ról atqarady. Zııaly qaýym ókilderi qoǵamdaǵy kókeıkesti máselelerge qatysty oı-pikirin, negizinen, merzimdi baspasóz arqyly bildiredi. Elimizde túrli kezeńde jaryq kórgen basylymdar qashanda ult múddesine adal qyzmet etken. Aǵa býynnyń sara jolyn qazirgi kásibı jýrnalıster laıyqty jalǵastyryp keledi. Olar shynaıy aqparat taratyp, jalpyulttyq qundylyqtardy keńinen nasıhattaýǵa belsene atsalysyp júr. Gazet-jýrnaldarymyz aldaǵy ýaqytta da jasampaz bastamalardy júzege asyrýǵa, ulttyń jańa sapasyn qalyptastyrýǵa jáne el birligin nyǵaıtýǵa zor úles qosa beredi dep senemin. Barshańyzǵa shyǵarmashylyq shabyt, baq-bereke tileımin! , — dedi Memleket basshysy.

Búgin elimizdegi baspasóz kúnine oraı, Kazinform tilshisi aımaqtardaǵy merzimdi basylymdardyń jaı-kúıin zerdelep kórdi.

Eske salsaq, budan buryn Prezıdent Úndistan Premer-mınıstrin Respýblıka kúnimen quttyqtaǵanyn jazdyq.