Prezıdent Ulttyq bank týraly jańa erejeni bekitti
ASTANA. KAZINFORM — Qazaqstan Respýblıkasynyń Prezıdenti Qasym-Jomart Toqaev Ulttyq bank týraly erejeni jańartty.
Ulttyq bank — Qazaqstan Respýblıkasy Prezıdentine tikeleı baǵynatyn jáne esep beretin memlekettik organ.
— Ulttyq bank memlekettiń aqsha-nesıe saıasatyn ázirleýdi jáne júrgizýdi, tólem júıesiniń jumys isteýin qamtamasyz etýdi, qarjy júıesiniń turaqtylyǵyn qamtamasyz etýge járdemdesýdi, valıýtalyq retteý men valıýtalyq baqylaýdy, statıstıkalyq qyzmetti, sondaı-aq quzyreti sheginde Qazaqstan Respýblıkasynyń qarjy zańnamasy salasynda qarjy naryǵyna, qarjy uıymdaryna jáne ózge de tulǵalarǵa memlekettik retteýdi, baqylaý men qadaǵalaýdy júzege asyrady, — delingen qujatta.
Ulttyq bank — Qazaqstan Respýblıkasynyń ortalyq banki jáne Qazaqstan Respýblıkasynyń bank júıesiniń joǵarǵy (birinshi) deńgeıi.
Qujatpen Ulttyq banktiń fýnktsııalary keńeıtildi, tóraǵanyń, basqarmanyń, dırektorlar keńesiniń, aqsha-nesıe saıasaty komıtetiniń ókilettigi aıqyndaldy.
Ulttyq bank tóraǵasy Qazaqstan Respýblıkasy Prezıdentiniń usynysy boıynsha Parlament Senatynyń kelisimimen 6 jyl merzimge taǵaıyndalady jáne Qazaqstan Respýblıkasynyń Prezıdenti tarapynan qyzmetinen bosatylady.
Prezıdent Jarlyǵy 2025 jylǵy 1 qyrkúıekten kúshine engizildi.
Aıta ketsek, bıyl tamyzda Ulttyq banktiń altyn-valıýta qory rekordtyq deńgeıge jetti.