Prezıdent Túrkistan oblysynyń «SPK TURKISTAN» óndiristik parkindegi kásiporyndarmen tanysty
TÚRKІSTAN. KAZINFORM – Qasym-Jomart Toqaev óńirdegi ınvestıtsııalyq jobalar shoǵyrlanǵan «SPK TURKISTAN» óndiristik parkin aralap kórdi.
Óndiristik parktiń qurylysy 100 gektar jerge salynady. Qurylys eki kezeń boıynsha júzege asyrylady. Indýstrııalyq alańnyń birinshi kezeńinde 30 gektar jer telimi bólinip, tıisti ınfraqurylymmen jáne kommýnıkatsııa jelilerimen qamtamasyz etildi. Bastapqyda jalpy quny 96,9 mıllıard teńgeni quraıtyn 29 ınvestıtsııalyq jobany iske asyrý josparlanǵan. Búginde ınvestıtsııa kólemi 36,5 mıllıard teńge bolatyn 8 óndiris iske qosylyp, 712 jańa jumys orny ashyldy.
Memleket basshysy, eń aldymen, kókónis saqtaý qoımasymen tanysty.
Munda 3,5 myń tonna kókónis pen 500 tonna bakaleıa ónimderin saqtap, Túrkistan, Kentaý jáne Arys qalalaryn maýsymaralyq kezeńde azyq-túlikpen qamtamasyz etedi. Jobany «Túrkistan» áleýmettik-kásipkerlik korporatsııasy men «M-Adal» kompanııasy júzege asyrdy. Aldaǵy ýaqytta aımaqtaǵy Leńgir, Jetisaı, Shardara, Saryǵash sekildi iri eldi mekenderdi áleýmettik mańyzy bar azyq-túlikpen qamtamasyz etý úshin Saryaǵash qalasynan 2 myń tonnalyq qoıma salý josparlanǵan.
Qasym-Jomart Toqaevqa jańbyrlatyp jáne tamshylatyp sýarý júıelerin shyǵaratyn «BNK Group» seriktestiginiń óndiris tsehtary tanystyryldy.
Kásiporyn amerıkalyq «Nelson Irrigation» kompanııasymen birlesip, «BNK IRRIGATION» saýda belgisimen aınalmaly jáne frontaldy jańbyrlatqysh mashınalar óndirisin iske qosqan. Kelesi kezekte tamshylatyp sýarý qondyrǵylaryn shyǵaratyn eki zaýyt ashýdy kózdep otyr. Prezıdent tapsyrmasyna sáıkes, bul 2030 jylǵa deıin oblysta 216,3 myń gektar jerge sý únemdeý tehnologııasyn engizýge múmkindik beredi.
Memleket basshysy bilim berý mekemelerine arnalǵan jıhaz shyǵaratyn «Aqniet Holding» ónimderin kórdi.
Sońǵy úsh jylda kompanııa 50-ge jýyq mektepti jabdyqtaǵan. Munda «Jaıly mektep» standartyna saı jıhazdar, «KAZMEDPRIBOR» kompanııasymen birlesip, medıtsına mekemelerine arnalǵan jabdyqtar jasalady.
Prezıdent tońazytqysh jáne muzdatqysh jabdyqtaryn óndiretin «Jasyl suyq Qazaqstan» kásipornynyń óndiris alańyna bardy.
Ónimderin Ortalyq Azııa elderine ımporttap kele jatqan bolgarııalyq UBC Group holdıngi Túrkistan oblysynda eki iri óndiris jelisin ashý jóninde sheshim qabyldaǵan. Investor jobanyń birinshi kezeńine 5 mıllıon eýro kóleminde qarjy quıady. «SPK TURKISTAN» aýmaǵyndaǵy óndiris alańynda 350-ge jýyq jumys orny ashylady. Al «Turan» arnaıy ekonomıkalyq aımaǵynda iske qosylatyn ekinshi zaýytqa 7,5 mıllıard teńge ınvestıtsııa salynady. Nátıjesinde aıyna 10 myńǵa deıin tońazytqysh jabdyǵyn shyǵaryp, myń adamdy jumyspen qamtý josparlanyp otyr.
Qasym-Jomart Toqaev «Turan Su» mekemesiniń qyzmetimen tanysty.
2019 jyly qurylǵan kásiporynnyń negizgi mindeti – memleket menshigindegi ırrıgatsııalyq júıeler men gıdrologııalyq qurylys jaılaryn kútip ustaý, jóndeý jáne rekonstrýktsııalaý, eldi mekenderdi aǵyn sýmen qamtamasyz etý. «Turan Su» basshylyǵy jumysty tıimdi uıymdastyryp, tabysty eseleý arqyly qosymsha ınvestıtsııalyq jobalardy júzege asyra bastaǵan. Atap aıtqanda, bıyl kásiporyn ındýstrııalyq park aýmaǵynda jylyna 9 myń gektarǵa tamshylatyp sýarý júıesin shyǵaratyn óndiristi iske qosty. Keleshekte kásiporyn sýarý júıelerine arnalǵan parabolalyq naýalar óndirisin jolǵa qoımaq.
Oblys ákimi Darhan Satybaldynyń aıtýynsha, óńir ekonomıkasynyń damýyna tyń serpin berý úshin Túrkistan oblysynda 2024-2027 jyldar aralyǵynda jalpy quny 2,5 trıllıon teńge bolatyn 145 ınvestıtsııalyq jobany júzege asyrý – basty maqsattardyń biri. Nátıjesinde 20 myńnan astam jańa jumys orny paıda bolady.
Prezıdentke qytaılyq «Xinjiang Lihua (Group) Co.Ltd» kompanııasymen óńirde maqtanyń elıtalyq suryptaryn ósirý jáne toqyma klasterin qurý jóninde kelissózder júrgizilip jatqany baıandaldy.
Budan bólek, iri jobalardyń qatarynda qýaty 926,5 MVt bý-gaz qondyrǵysynyń, 800 MVt kún jáne jel elektr stantsııalarynyń, Túrkistan qalasyndaǵy bes juldyzdy qonaq úıdiń qurylysy, dron jáne beınebaqylaý kameralary, gaz qazandyqtary, turmystyq tehnıka, taý-ken jáne metallýrgııa keshenine arnalǵan qurylǵylar, alıýmınıı buıymdar óndirisi sekildi mańyzdy bastamalar bar.
Memleket basshysyna boılerler, transformatorlar men elektr tehnıkasy jabdyqtaryn, aýyl sharýashylyǵy tehnıkasyn, qurylys materıaldary men hımııalyq zattar óndiretin, júgerini tereń óńdeıtin, sýsyn, kıim-keshek, aıaq kıim, jıhaz túrlerin shyǵaratyn kásiporyndar tanystyryldy.
