Prezıdent Túrkistan oblysyndaǵy órtten adamdardyń qaıtys bolýyna baılanysty kóńil aıtty
ASTANA. KAZINFORM - Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.
Bul týraly QR Prezıdentiniń kómekshisi – Baspasóz hatshysy Rýslan Jeldibaı Telegram arnasynda jazdy.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Búgin tańerteń Túrkistan oblysy TJD «101» pýltine Jetisaı aýdanynyń Alǵabas aýylynda ornalasqan eki qabatty jeke turǵyn úıdiń órtengeni týraly habarlama túsken. Oqıǵa ornyna órt sóndirýshiler jetkenshe turǵyn úı tolyqtaı órtke oranǵan.
Órtti barlaý jáne sóndirý barysynda úıdiń ishinen es-tússiz kúıdegi úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda, barlyǵy 12 adamnyń denesi tabylǵan.
Kórshilerdiń aıtýynsha, aldyńǵy kúni úı ıeleri is-shara ótkizgen, úıde qonaqtar bolǵan.
Oqıǵa ornynda barlyq jedel qyzmetter jumys istep jatyr. Tergeý bastaldy.