Prezıdent Teleradıokesheni Silk Way Cinema atty halyqaralyq telearna ashady
Telearna qazaq jáne orys tilderinde táýlik boıy habar taratady, arna sıgnaly onnan astam taıaý shet elderge qoljetimdi bolady. Jańa spýtnıktik arnanyń komandasy tanymdyq jáne bilim berý baǵdarlamalaryn, derekti jáne mýzykalyq jobalardy, telehıkaıalardy efırge shyǵarmaq.
Sonymen birge, Silk Way Cinema efırinde respýblıkalyq telearnalar men «Qazaqfılm» kınostýdııasynyń fılmdik kontenti de kórsetiledi.
«Silk Way Cinema ózin jaǵymdy kóńil-kúı kózi retinde tanytady, jańa telearna aýdıtorııasyna tek qana qazaqstandyq kontent usynylady. QR Prezıdenti Teleradıokesheniniń jańa medıa-resýrsy otandyq kreatıvti ındýstrııanyń úlgisi bolýdy, kórshi memleketter arasyndaǵy mádenı-gýmanıtarlyq baılanystardy nyǵaıtýdy, sondaı-aq túrli elderdegi qazaq dıasporasy ókilderine sapaly kontent usynýdy josparlap otyr», - dep jazylǵan Prezıdent Teleradıokesheniniń habarlamasynda.
Aıta keteıik, QR Prezıdenti Teleradıokesheni Qazaqstannyń iri medıa-kompanııasy sanalady. Onyń quramyna respýblıkalyq Jibek Joly telearnasy, halyqaralyq Silk Way telearnasy, «QazAqparat» HAA jáne Derekti kıno ortalyǵy kiredi.
«Jibek Joly» alǵashqy ulttyq spýtnıktik telearnasy 2022 jyldyń 1 qyrkúıeginde iske qosyldy. Telearna HotBird 13B, Galaxy 19, Yamal 401 90° (FSU), Türksat 3A, KazSat 3 (Qazaqstan) jáne MEASAT 3A spýtnıkteri arqyly jańa «Silk Way» brendimen álemniń 118 eliniń kórermenderi úshin 5 tildik nusqada – qazaq, orys, aǵylshyn, ózbek, qyrǵyz tilderinde qoljetimdi. «Jibek Joly» ulttyq telearnasynyń jáne onyń «Silk Way» spýtnıktik nusqasynyń jıyntyq aýdıtorııasy búkil álem boıynsha 300 mıllıonnan astam kórermendi quraıdy.
