Prezıdent: Táýelsizdik — bárinen qymbat qundylyǵymyz

ASTANA. KAZINFORM — Prezıdent Respýblıka kúnine arnalǵan saltanatty jıynda sóz sóıledi. Bul týraly Aqorda málim etti.

— Bul kúndi halqymyzdyń derbes el bolýyna jol ashqan qasterli kún deýge bolady» «Elimizdiń eń basty merekesi — Respýblıka kúni qutty bolsyn! Ulttyq meıram qarsańynda dástúrge saı Aqorda tórinde memleketimizdiń úzdik azamattarymen birge jınalyp otyrmyz. Bıyl elimiz azattyqtyń mereıli belesine jetti. Osydan 35 jyl buryn Qazaqstannyń Egemendigi týraly deklaratsııa qabyldandy. Dál osy kúni san ǵasyrlyq memlekettilik dástúrimiz qaıta jańǵyrdy. Kóp uzamaı jurtymyz Táýelsizdik baıraǵyn kóterdi. Tarıhı ádildik ornap, ulttyń rýhy asqaqtady. Sondyqtan bul kúndi halqymyzdyń derbes el bolýyna jol ashqan qasterli kún deýge bolady. Táýelsizdik — bárinen qymbat qundylyǵymyz. Ony saqtap, nyǵaıta túsý — barshamyzǵa ortaq qasıetti borysh. Egemendik — ata-babalarymyzdyń ult múddesi jolyndaǵy óshpes erliginiń aıqyn kórinisi, — dedi Qasym-Jomart Toqaev.

Memleket basshysy «Biz ótkennen sabaq alyp, eshkimge jaltaqtamaı, óz jolymyzben júrip kelemiz» dedi.

— Zańǵar oıshyl Ábish Kekilbaev „Ótkennen taǵylym, erteńnen úmit izdegender ǵana ilgeri basa alady“ degen. Biz ár kezeńde ult tarıhynda óshpes iz qaldyrǵan barlyq memleket jáne qoǵam qaıratkerlerine qurmet kórsetemiz, olardy eshqashan umytpaımyz. Sonymen birge keleshekke úlken úmitpen, zor senimmen qaraımyz, bıik maqsattarǵa umtylamyz. Osy jyldarda elimizdiń baǵyndyrǵan belesteri az emes. Biz jer júzine egemen memleket retinde tanyldyq. Shekaramyzdy shegendep, irgemizdi bekitip, qaýipsizdigimizdi qamtamasyz ettik. Birligimizdi bekemdep, tatýlyq pen turaqtylyqtyń arqasynda túrli synaqtardan súrinbeı óttik. Búginde jahan jurty elimizdiń ósip-órkendep kele jatqanyna kýá bolyp, óz qurmetin kórsetýde. Alaıda kemshiliksiz, minsiz jumys bolmaıtyny anyq. Biz ótkennen sabaq alyp, eshkimge jaltaqtamaı, óz jolymyzben júrip kelemiz. Sońǵy jyldary halyqtyń ál-aýqatyn arttyrý úshin asa mańyzdy qadamdar jasaldy. 2019 jyly aýqymdy reformalar qolǵa alyndy. Qazaqstan jańa turpatty el bolý jolyna tústi. Jalpyhalyqtyq referendým arqyly Ata zańymyzǵa túzetýler engizildi. Parlamenttiń quzyreti keńeıdi, Úkimettiń jaýapkershiligi artty. Konstıtýtsııalyq sot quryldy. Adam quqyqtary jónindegi ýákil ınstıtýty konstıtýtsııalyq mártebege ıe boldy. Bıyl shilde aıynan bastap Kassatsııalyq sot júıesi iske qosyldy, bul qoǵamymyzda ádilettilikti kúsheıtýge jaǵdaı jasady, — dedi Prezıdent. 

Aıta keteıik, Respýblıka kúni qarsańynda Prezıdent bir top azamatty memlekettik nagradamen marapattady.