Prezıdent tapsyrmasy: Elimizde jas ǵalymdarǵa qandaı jaǵdaı jasalǵan

NUR-SULTAN. QazAqparat – Qazaqstanda jas ǵalymdarǵa qandaı jaǵdaı jasalǵan. Ǵylymǵa qyzyǵýshy mamandardyń qandaı múmkindikteri bar? Osy jáne ózge de otandyq ǵalymdar taqyrybyna arnalǵan suraqtarǵa QR Bilim jáne ǵylym mınıstrligi Ǵylym komıtetiniń tóraǵasy Janna Qurmanǵalıeva jaýap berdi, dep habarlaıdy QazAqparat tilshisi.

«Byltyr Memleket basshysy Joldaýynda jas ǵalymdarǵa arnalǵan jylyna kem degende 1 myń oqý grantyn bólýdi tapsyrdy. Osy oraıda bıyldan bastap PhD ǵalymdarǵa 3 jyldyq ǵylym granty qarastyrylyp otyr. Jalpy granttyń quny 24 mln teńge ıaǵnı jas ǵalymǵa jylyna 8 mln teńge bólinedi. Jáne 1 myń AQSh dollary kóleminde stıpendııa tólenbek. Grantty utyp alýdyń eki sharty bar. Birinshiden, jas ǵalymnyń ǵylymı jetekshisi bolý kerek. Ekinshiden, úmitkerdiń sheteldik ǵylymı konsýltanty bolýy tıis. Eń bastysy ǵylymmen aınalysamyn, qazaqstandyq ǵylymǵa úlesimdi qosamyn degen talpynysy bolǵany jón. Odan bólek, óziniń ǵylymı taqyryby, ıdeıasy bolǵany abzal», - dedi Janna Qurmanǵalıeva OKQ-de ótken baspasóz máslıhatynda.

Onyń aıtýynsha, sońǵy ýaqytta otandyq jas ǵalymdarǵa erekshe nazar aýdarylyp jatyr.

«Búginde jas ǵalymdardyń qatysýymen elimizde 315 ǵylymı joba iske asyrylyp jatyr, ol úshin 17,8 mlrd teńge qarastyrylǵan. Prezıdenttiń taǵy bir tapsyrmasy otandyq ǵalymdardyń shetelden taǵylymdamadan ótýi. Tapsyrmaǵa saı jyl saıyn 500 qazaqstandyq ǵalym sheteldiń tanymal oqý oryndarynan taǵylymdamadan ótýi tıis. Búginde «Bolashaq» baǵdarlamasy arqyly 49 otandyq jas ǵalym shetelden taǵylymdamadan ótý múmkindigine ıe bolyp otyr. Sol úrdis jyl sońyna deıin jalǵasyn tabady. Osylaısha jas ǵalymdarymyzdyń álemniń kez-kelgen jerinde ozyq tájirıbe alyp, ǵylymmen aınalysýǵa múmkindigi bar», - deıdi ol.

Sondaı-aq, komıtet basshysy bıyl 28 qazanda qazaqstandyq ǵalymdardyń shetelden taǵylymdamadan ótýine arnalǵan baıqaý ótetinin tilge tıek etti.

Buǵan deıin habarlaǵanymyzdaı, elimizde 2025 jyly ǵalymdardyń sany 1,5 esege kóbeıetini aıtyldy.