Prezıdent suhbatynda barlyq azamattyń kókeıinde júrgen máseleler jan-jaqty talqyǵa tústi- sarapshy

NUR-SULTAN. QazAqparat – Prezıdent suhbatynda barlyq azamattyń kókeıinde júrgen máseleler jan-jaqty talqyǵa tústi. Mundaı pikirdi «Rýhanı jańǵyrý» QQDI Strategııalyq saraptaý tobynyń jetekshisi Lázzat Nurqatova bildirdi, dep habarlaıdy QazAqparat tilshisi.

«Prezıdenttiń senbi kúngi suhbatyn úlken yqylaspen tyńdadym. Alǵashqy mınýttardan-aq onyń ashyqtyǵyn, shynaıylyǵyn jáne dıalogqa oń qaraıtyndyǵyn sezindim. Qasym-Jomart Kemeluly qoıylǵan suraqtardyń bárine ashyq jaýap berip, yńǵaıǵa kelmeıtin, qıturqy suraqtardan da jaltarǵan joq. Eń bastysy búginde barlyq azamattyń kókeıinde júrgen máseleler jan-jaqty talqyǵa tústi», - dedi ol Memleket basshysy Qasym-Jomart Toqaevtyń keshegi «Habar» agenttigine bergen suhbatyna oraı.

Onyń atap ótýinshe, suhbat barysynda QR Prezıdenti UQShU-nyń bitimgershilik áskerin kirgizý, oq atýǵa buıryq berý, Qytaımen jáne Reseımen syrtqy saıasat, eldegi kadrlyq aýys-túıis máselelerine qatysty oıyn ashyq jetkizdi.

«Memleket basshysy Tuńǵysh Prezıdent – Elbasynyń el damýyndaǵy sózsiz úlesin taǵy bir eske saldy. Bul jaıynda ol kúni keshe ǵana ótken Nur Otan parııasynyń kezekten tys sezinde de aıtqan edi. Prezıdent qoǵamdaǵy ózekti kez kelgen máseleni talqylaýǵa daıyn ekendigin bildirdi. Sonymen qatar sheshimder qabyldaý barysynda azamattardyń pikirin eskerý qajettigin basa aıtty. Qasym-Jomart Toqaev Konstıtýtsııaǵa sáıkes qabyldanǵan sheshimderdiń, qasiretti qańtar kúnderi qabyldanǵan is-sharalardyń durystyǵyna tolyǵymen jaýap beretindigin kórsetti», - dedi Lázzat Nurqatova.