Serdjıo Gor Qasym-Jomart Toqaevqa AQSh Prezıdentiniń sálemin jetkizdi
ASTANA. KAZINFORM – Memleket basshysy AQSh Prezıdentiniń Ońtústik jáne Ortalyq Azııa boıynsha arnaıy ókili Serdjıo Gormen jáne AQSh Memlekettik hatshysynyń birinshi orynbasary Krıstofer Landaýmen kezdesti. Bul týraly Aqordanyń baspasóz qyzmeti habarlady.
Kezdesýde Vashıngtonda ótetin S5+1 sammıti qarsańynda qazaq-amerıka keńeıtilgen strategııalyq seriktestigin damytý perspektıvasy talqylandy.
Qasym-Jomart Toqaev Donald Tramptyń S5+1 sammıtine arnaıy shaqyrǵany úshin alǵys aıtty.
Prezıdent aldaǵy joǵary deńgeıdegi kezdesý uzaq merzimdi yntymaqtastyqtyń basty baǵyttaryn aıqyndaý turǵysynan nátıjeli bolatynyna senim bildirdi.
Qazaqstan Amerıkamen saýda-ekonomıkalyq jáne ınvestıtsııalyq seriktestikke tyń serpin berýge múddeli.
Memleket basshysy elimizdiń AQSh Prezıdenti júrgizip otyrǵan ishki jáne syrtqy saıasatty qoldaıtynyn jetkizdi. Osy oraıda Donald Tramptyń beıbitshilikti nyǵaıtýǵa jáne halyqaralyq qaýipsizdikti qamtamasyz etýge qosqan úlesin joǵary baǵalady.
Qazaqstan Prezıdenti jahandyq úderisterdegi Ortalyq Azııanyń róli artyp kele jatqanyna toqtaldy. Aımaq elderi buryn-sońdy bolmaǵan birliktiń úlgisin, tatý kórshilik pen ortaq progreske degen umytylysyn kórsetip otyr.
Serdjıo Gor Qasym-Jomart Toqaevqa Amerıka Prezıdentiniń sálemin jetkizdi.
Ol AQSh syrtqy saıasatyndaǵy Ortalyq Azııa óńiriniń strategııalyq mańyzyn rastady. Onyń pikirinshe, Vashıngtonda ótetin aldaǵy kezdesý ekijaqty yntymaqtastyqty jańa deńgeıge kóteredi.
Áńgimelesý barysynda energetıka, asa mańyzdy mıneraldar, tsıfrlandyrý, kólik jáne logıstıka salalaryndaǵy ózara tıimdi seriktestiktiń áleýeti qarastyryldy.
Budan bólek, óńirlik jáne halyqaralyq kún tártibindegi ózekti máselelerge nazar aýdaryldy.
Eske sala keteıik, buǵan deıin AQSh prezıdentiniń Ońtústik jáne Ortalyq Azııa boıynsha arnaıy ókili Serdjıo Gor men AQSh Memlekettik hatshysynyń birinshi orynbasary Krıstofer Landaý Aqordaǵa kelgenin habarlaǵanbyz.