Prezıdent aldaǵy jyldardaǵy bıýdjet týraly zańdy bekitti
ASTANA. KAZINFORM - Memleket basshysy «2025 – 2027 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna qol qoıdy, dep habarlaıdy Aqorda.
Buǵan deıin habarlanǵandaı, Senattyń jalpy otyrysynda «2025 – 2027 jyldarǵa arnalǵan respýblıkalyq bıýdjet týraly» Zańy qaraldy.
Zań jobasyna sáıkes 2025 jylǵa túsimder osy jylmen salystyrǵanda 1,2 trln teńgege ulǵaıa otyryp, 21,7 trln teńge deńgeıinde boljandy. 2025 jyly bıýdjet tapshylyǵy jalpy ishki ónimge shaqqanda 2,7% deńgeıinde eskerilgen, al 2027 jylǵa qaraı bul kórsetkish 1,9%-ǵa deıin tómendeıdi.
Bıýdjettiń 2025 jylǵa arnalǵan shyǵystary túsimder men tapshylyqty eskere otyryp, 25,8 trln teńgeni quraıdy, ıaǵnı bıylmen salystyrǵanda 1,7 trln teńgege ulǵaıyp otyr.
Parlament Senatynda zańdy talqylaý barysynda birqatar usynys engizildi. Olar halyqty taza sýmen qamtamasyz etý, gazdandyrý júıesin, jylý elektr energetıkasyn, kólik, ınjenerlik-kommýnıkatsııa ınfraqurylymyna, sondaı-aq «Aýyl - El besigi» jobasyn iske asyrýǵa qosymsha shyǵystar kózdelgen
2025 jyly áleýmettik salanyń shyǵystary osy jylǵa qaraǵanda 871 mlrd teńgege ulǵaıyp, 9,8 trln teńge kóleminde josparlandy. Onyń bıýdjet shyǵystaryndaǵy úlesi 38 paıyzdy quraıdy. Birinshi basymdyq – áleýmettik qamtamasyz etý jáne azamattarǵa áleýmettik kómek kórsetý. 2025 jylǵa áleýmettik tólemderge arnalǵan shyǵystar – ındeksteý men tólemderdi alýshylar sanynyń ulǵaıýyn eskere otyryp, 6 trln teńge somasynda qarastyrylǵan.
Ekinshi basymdyq – bilim berýdi damytý. 2025 jyly bul baǵytqa shyǵystar 1 trln teńgege jetti.
Densaýlyq saqtaý júıesine 2025-2027 jyldarǵa arnalǵan shyǵystar 7,6 trln teńgeni quraıdy, onyń ishinde bıylmen salystyrǵanda 188 mlrd teńgege ulǵaıyp, 2025 jylǵa 2,5 trln teńge qarastyrylǵan. Jalpy, 2025 jyly tegin medıtsınalyq kómektiń kepildik berilgen kólemine 1,6 trln teńge somasynda shyǵystar josparlandy. Áleýmettik medıtsınalyq saqtandyrý qoryna 675 mlrd teńge, onyń ishinde memlekettik jarnalarǵa 668 mlrd teńge kózdelgen.
Al 2025 jyly týrızm men sportty damytýǵa respýblıkalyq bıýdjet shyǵystary 141 mlrd teńge, al mádenıet pen aqparatty damytýǵa 165 mlrd teńge kóleminde josparlanǵan.
Keıin Májilis úsh jyldyq bıýdjetke Senat engizgen túzetýlermen kelisti.
Senat «2025-2027 jyldarǵa arnalǵan respýblıkalyq bıýdjet týraly» Zańyna jalpy somasy 118,8 mlrd teńgege 135 túzetý engizdi.