Prezıdent Mańǵystaýda aýyl sharýashylyǵy shıkizatyn óńdeıtin kásiporyndar salý máselesin kóterdi
«Mańǵystaýdyń aýyl sharýashylyǵy salasyndaǵy áleýetin arttyryp, azyq-túlik naryǵyn damytý asa mańyzdy. Agroónerkásip salasy – el ekonomıkasyn damytý isindegi strategııalyq basymdyqtyń biri. Men halyqaralyq forýmdarda álemdik naryqqa azyq-túlik ónimderin kóptep shyǵara alamyz dep jıi aıtamyn. Buǵan bizde mol múmkindik bar. Biraq, eń aldymen, óz elimizdi sapaly ári arzan azyq-túlikpen qamtamasyz etýimiz kerek. Mańǵystaý óńiri úshin bul másele aıryqsha mańyzdy. Aımaq turǵyndary jyl saıyn 100 mıllıon dollardyń azyq-túligin syrttan alady. Mundaı táýeldilik onyń baǵasyna tikeleı áser etetini belgili. Jyl basynan beri azyq-túlik baǵasy 20 paıyzdan astam qymbattaǵan. Kóbine mundaı ahýaldyń qalyptasýyna aımaqtyń ornalasqan jeri jáne logıstıka máseleleri sebep bolyp otyr», - dedi QR Prezıdenti.
Qasym-Jomart Toqaev Mańǵystaý oblysynda azyq-túlikti eksporttaý jáne ımporttaý múmkindigin keńeıtý qajettigine nazar aýdardy.
«Mańǵystaý Qazaqstannyń kólik-tranzıt strategııasynda mańyzdy ról atqarady. Munda azyq-túlikti eksporttaý jáne ımporttaý múmkindigin keńeıtken jón. Sondaı-aq, óńirdiń kólik-logıstıka áleýetin arttyrý kerek. Tranzıttik taýarlardyń bir bóligin ishki naryqqa baǵyttap, azyq-túlik baǵasyn tómendetýge bolady. Alpaýyt elderdiń bir-birine sanktsııa salýy jaǵdaıdy qıyndatyp tur. Sheteldik seriktesterimizben birge aýyl sharýashylyǵy shıkizatyn óńdeıtin kásiporyndar salý máselesin qarastyrý qajet. Sosyn odan shyqqan daıyn taýardy qaıtadan eksporttaýǵa bolady. Áleýmettik mańyzy bar azyq-túlik ónimderin elimizdiń basqa óńirlerinen Mańǵystaýǵa jetkizý mańyzdy. Úkimet mundaı taýarlardy osy jaqqa tasymaldaý úshin «aıryqsha tómen tarıf» engizý jaıyn pysyqtasyn», dep atap ótti Memleket basshysy.
