Prezıdent kýbogy: Arýjan Saǵyndyqova jartylaı fınalǵa shyqty
ASTANA. KAZINFORM – Qazaqstandyq tennısshi Arýjan Saǵyndyqova jekeleı synda Prezıdent kýbogy úshin elordada ótip jatqan ITF W15 týrnıriniń jartylaı fınalyna ótti.
Qazaqstandyq tennısshi shırek fınalda Belarýs ókili Vladıslava Zverevanyń mysyn basty.
Birinshi partııada belorýssııalyq tennısshi 7:5 esebimen basym túskenimen, Arýjan kambek jasaı bildi – 6:0, 6:3.
Arýjan Saǵyndyqova fınalǵa shyǵý úshin álemniń 739-raketkasy, reseılik Edda Mamedovamen talasady.
Taǵy bir qazaqstandyq Іńkár Dúısebaı shırek fınaldaǵy tartysty básekede reseılik Ekaterına Haırýtdınovaǵa jol berdi – 7:6 (7:3), 2:6, 2:6.
Esesine І.Dúısebaı juptyq synda Asyljan Arystanbekovamen fınalǵa ótti. Qazaqstandyq dýet jartylaı fınalda belorýssııalyqtar Aglaıa Fedorova – Darıa Homýtıanskany qapy qaldyrdy – 6:2, 7:5.
Іńkár Dúısebaı – Asyljan Arystanbekova sońǵy básekede reseılik E.Haırýtdınova – belorýssııalyq Anna Kýbarevamen chempıondyq ataqty sarapqa salady. Bul jup jartylaı fınalda qazaqstandyq Sandýǵash Kenjebaeva – reseılik Alısa Kıýmmeldi utyp ketti – 6:4, 6:4.
Erler arasynda Ámir Omarhanov túrkııalyq Mert Alkaımen, Grıgorıı Lomakın reseılik Aleksandr Lobanovpen birge jartylaı fınalda qarsylastarynan utylyp qaldy.
Eske sala keteıik, budan buryn Rolan Garrostyń irikteý týrnırinde eki tennısshiniń fınalǵa joldama alǵanyn jazǵan edik.