Prezıdent kótergen basymdyqty baǵyttarǵa árbir azamat óz úlesin qosýy kerek - depýtat

NUR-SULTAN. QazAqparat - Ulyqtaý rásiminde Prezıdent Qasym-Jomart Toqaev kótergen basymdyqty baǵyttarda eń mańyzdy máseleler qamtyldy. Bul týraly Parlament Májilisiniń depýtaty Omarhan Óksikbaev málim etti, dep habarlaıdy QazAqparat.

«Ulyqtaý rásimi kezinde Memleket basshysy Qasym-Jomart Toqaevtyń óte mańyzdy usynystardy jasady. Shynyn aıtqanda, halyqtyń tabysyn arttyrý áleýmettik máselede ózindik ornyn alyp otyrǵan eleýli sharýa. Birinshiden, bul baǵytta ekonomıkamyzdyń ár salasyn damyta otyryp, biz turaqty jumys oryndaryn qamtamasyz etýimiz kerek. Al endi tabystyń ishinde de árbir jumystyń kásiptik deńgeıi bolýy qajet. Kásiptik joǵary deńgeıde bolsa, onda sol jumystyń tabystylyǵy arta túsedi. Meniń oıymsha, Úkimet bul baǵytqa erekshe ekpin qoıady dep esepteımin», - dedi O. Óksikbaev.

Budan bólek depýtat Prezıdenttiń 1 qyrkúıekke deıin jemqorlyqtyń deńgeıin meılinshe tómendetýge baǵyttalǵan reformalar toptamasyn daıyndaý tapsyrmasyna qatysty pikir bildirdi.

«Sybaılas jemqorlyqqa barynsha tosqaýyl qoıý, ony tejeý - bizdiń úlken mindetimiz. Sondyqtan bul protseske ár azamat aralasýy kerek, bul kúreste árbir adamnyń qosqan úlesimen eleýli nátıjege qol jetkize alamyz. Munymen qosa, jemqorlyqtyń aldyn alý úshin memlekettik salada qyzmet etip júrgenderdi áleýmettik qorǵaý máselesin de nazarǵa alýǵa tıistimiz. Olar erteńgi kúnine senimdi bolsa, memlekettik qyzmetshiler zań buzýshylyqqa nemese jemqorlyqqa barmaıdy. Osy oraıda Prezıdenttiń bastamalary aıasynda tıisti qadamdar eskeriledi dep oılaımyn», - dedi Omarhan Óksikbaev.

Budan buryn habarlanǵandaı, 12 maýsym kúni elordadaǵy Táýelsizdik saraıyndaǵy ulyqtaý rásiminde Qazaqstan Prezıdenti Qasym-Jomart Toqaev jaqynda áleýmettik-ekonomıkalyq damýdyń naqty mindetteri aıqyndalatynyn málim etti.

«Kelesi mańyzdy baǵyttarǵa basa mán berýimiz kerek. Birinshi baǵyt - halyqtyń tabysyn arttyrý. Turaqty jáne qarqyndy ekonomıkalyq ósim arqyly ǵana bul máseleni sheshýge bolady. Eń aldymen, ósim bizge ne úshin qajet ekenin tereń túsinýimiz kerek. Azamattarymyz óz elinde alańsyz ómir súrip, eńbek etip, urpaǵyn tárbıelep, halqymyzdyń jetistikterine birge qýanyp, maqtan tutýy úshin ekonomıkalyq ósim bolýy tıis. Taıaý arada Úkimettiń keńeıtilgen otyrysynda biz elimizdiń áleýmettik-ekonomıkalyq damýyndaǵy naqty mindetterdi aıqyndaımyz», - dedi Memleket basshysy.