Prezıdent «Qorqyt ata» áýejaıynyń jańa termınalymen tanysty

Memleket basshysy Qasym-Jomart Toqaev Qyzylordada «Qorqyt ata» áýejaıynyń jańa termınalymen tanysty. Kazinform agenttigi bul týraly Aqordaǵa silteme jasap habarlaıdy.

Oblys ákimi Nurlybek Nálibaev Prezıdentke jańa jolaýshylar termınalynyń qurylysy jóninde baıandady:

- jańa termınal jeke demeýshiniń qarajatyna salynyp, keıin memleket menshigine ótkiziledi;
- joba quny – 20 mıllıard teńge. Onyń ishinde 15,7 mıllıard teńge – demeýshiniń áýejaı qurylysy úshin bólgen qarjysy. Sondaı-aq jergilikti bıýdjetten áýejaıdyń syrtqy ınjenerlik-kommýnıkatsııalyq ınfraqurylymyn júrgizý úshin 4,3 mıllıard teńge qarjy bólingen;
- halyqaralyq standartqa saı bolatyn áýejaıda jolaýshylarǵa qyzmet kórsetý úshin barlyq jaǵdaı jasalady;
- jańa termınal kelesi jyly paıdalanýǵa beriledi. Nysan qoldanysqa berilgennen keıin jolaýshylar tasymaly bir saǵatta 250 jolaýshyǵa qyzmet kórsete alady;
- túrli baǵyttarǵa ushatyn áýe reısteriniń sany artady.

Budan bólek, oblys ákimi Qyzylorda qalasynda zamanaýı úlgide salynyp jatqan avtobekettiń bıyl jyl sońynda iske qosylatynyn jáne qalanyń temirjol vokzalyna da kúrdeli jóndeý jumystary júrgizilip jatqanyn jetkizdi.

Eske salaıyq, búgin tańerteń Memleket basshysy Qyzylorda oblysyna jumys saparymen bardy.

Qasym-Jomart Toqaevtyń óńirge sapary Syrdarııa aýdany Naǵı Іlııasov aýylynyń tynys-tirshiligimen tanysýdan bastaldy.

Odan ári Prezıdent byltyr boı kótergen «Eńbek alleıasynda» eńbek adamdarymen júzdesti.