Prezıdent qoǵam túıtkilderine der kezinde jaýap berdi – sarapshy

NUR-SULTAN. QazAqparat – Máskeý memlekettik ýnıversıtetiniń janyndaǵy Aqparattyq-saraptamalyq ortalyǵynyń bas redaktory Janar Tólendınova Memleket basshysynyń Úkimettiń keńeıtilgen otyrysyndaǵy sózine pikir bildirdi, dep habarlaıdy QazAqparat.

«Bul – jańadan saılanǵan Prezıdenttiń alǵashqy keńeıtilgen otyrysy jáne Qazaqstannyń ishki saıası ómirindegi mańyzdy oqıǵa. Óz sózinde Prezıdent ózekti máselelerdi saralap, naqty tapsyrmalar berdi. Mańyzdylyǵy jaǵynan bul shara Prezıdent Joldaýynan keıin tur dep aıtýǵa bolady. Árıne, bul Qasym-Jomart Toqaev úshin de úlken syn boldy. Ol ózin tájirıbeli saıasatker retinde kórsete aldy», - dedi Janar Tólendınova QazAqparat tilshisine bergen suhbatynda.

Onyń aıtýynsha, keńeıtilgen otyrysta Prezıdent óz saıasatynyń basym baǵyttaryn kórsete aldy.

«Ol áleýmettik saıasat pen qoǵam suraýyna der kezinde jaýap qatýǵa aıryqsha mán berdi. Máselen, Arystaǵy jaǵdaıdy beı-jaı qaldyrmaı, Qorǵanys mınıstrine qatań sógis jarııalady. Biraq, jańa mınıstr bolǵandyqtan otstavka bolmaıdy. Osylaısha, kadr saıasatynyń sabaqtastyǵy jalǵasady. Memleket basshysy nesıelik raqymshylyq týraly da pikir bildirdi. Bir jaǵynan bul halyqtyń belgili bir tobynyń áleýmettik optımızmin kóterse, ekinshi jaǵynan áleýmettik saladaǵy masyldyq úrdiske ulasyp ketpeı me degen pikir aıtyldy. Prezıdent munyń bir rettik naýqan ekenin atap kórsetti», - dedi spıker.

Sonymen birge, sarapshy Prezıdenttiń jer máselesi boıynsha pikirin aıryqsha atap ótti.

«Prezıdenttiń jer jáne elordadaǵy LRT máselesin kóterýi qoǵam saýalyna der kezinde jaýap beretinin kórsetedi. Kóptegen ózekti máseleler taldandy, qoǵam narazylyǵyn týdyrǵan kemshilikter talqylandy. Olardyń jaqyn arada sheshilerine úmittenemin», - dep óz sózin túıindedi J. Tólendınova.