Prezıdent Qazaqstannyń Ortalyq Azııa Іskerlik keńesin qurý týraly usynysty qoldaıtynyn málimdedi
ASTANA. KAZINFORM – Memleket basshysy Qazaqstannyń Ortalyq Azııa Іskerlik keńesin qurý týraly usynysty qoldaıtynyn málimdedi, dep habarlaıdy Aqordanyń baspasóz qyzmeti.
Onyń pikirinshe, aımaqtyń kólik-tranzıt áleýetin odan ári ilgeriletýdiń, sondaı-aq Ortalyq Azııanyń kólik júıesin damytý jónindegi keshendi strategııany qabyldaýdyń máni zor
– Transkaspıı halyqaralyq kólik baǵyty, «Soltústik – Ońtústik» dálizi, «Bir jol, bir beldeý» sekildi bastamalardyń mańyzy aıryqsha. Bul jobalarǵa Ortalyq Azııadaǵy barlyq eldiń belgili bir deńgeıde qatysy bar. Birlesken kúsh-jigerdiń nátıjesinde «Qazaqstan – Túrikmenstan – Iran» temirjol magıstraliniń áleýeti dáıekti túrde artyp keledi. Qazirgi tańda bul Parsy shyǵanaǵyndaǵy elderge shyǵatyn eń tóte jol sanalady. Sonymen qatar Ońtústik Azııa naryǵyna shyǵý úshin Aýǵanstan arqyly temirjol salýdyń keleshegi zor dep esepteımiz. Qazaqstan óziniń kólik-tranzıt salasynda aýqymdy jumys atqaryp jatyr. 2030 jylǵa deıin 11 myń shaqyrym temirjoldy jańǵyrtyp, jańadan 5 myń shaqyrym temirjol salýdy josparlap otyrmyz, – dedi Qasym-Jomart Toqaev.
Óńirdiń kún tártibindegi taǵy bir mańyzdy másele – sý-energetıka resýrstaryn ratsıonaldy paıdalaný. Memleket basshysy sýdy paıdalanýdyń teń quqyly ári ádil tártibine, ózara mindettemeni múltiksiz oryndaý erejesine negizdelgen jańa sý saıasatyn qalyptastyrý kerek dep sanaıdy.
– Ortalyq Azııa elderine arnalǵan Sý-energetıka konsortsıýmyn qurý jáne gıdroenergetıkalyq nysandardy birlese salý bastamasy sý sharýashylyǵyndaǵy kópjaqty yntymaqtastyqqa negiz bolady. Sýdy bólý men esepke alýdy tsıfrlandyrý, ǵaryshtyq monıtorıng tehnologııalaryn engizý, júıeli ǵylymı jumystar júrgizý mańyzdy mindetterdiń sanatyna jatady, – dedi Memleket basshysy.
