Prezıdent qazaqstandyqtardyń ulttyq arman-muratyn atady

BÝRABAI. KAZINFORM –  Ulttyq quryltaıdyń ІV otyrysynda sóz alǵan Memleket basshysy Qasym-Jomart Toqaev qazaqstandyqtarǵa ortaq arman-murat bolýǵa tıis qundylyqtardy atady.

- Bizdiń ultymyzdyń arman-muraty Ádiletti, Qaýipsiz, Taza, Qýatty Qazaqstandy qurý ıdeıasynan bastaý alady. Biz barshaǵa jáne árkimge zor múmkindik beretin memleket quryp jatyrmyz. Bul – ár azamat óz qabiletin shyńdap, adal eńbegimen otbasyn asyraı alatyn el bolý degen sóz. Zań jáne tártip – bizdiń myzǵymas tuǵyrymyz. Bul, eń aldymen, elimizdiń ár azamatyna jáne barsha halqymyzǵa ortaq tártip. Al bizdiń ıdeologııamyz – qarapaıym ári túsinikti. Bul – jahandaǵy asa kúrdeli geosaıası ahýalda elimizdi jańa damý deńgeıine kóterý úshin berik negiz qalaý degen sóz, - dedi Qasym-Jomart Toqaev.

Prezıdenttiń paıymdaýynsha, memlekettiń taǵdyry men ultymyzdyń berekeli ómiri osyǵan tikeleı baılanysty.

- Sizder Ulttyq quryltaı aıasynda kóptegen bastama kóterip, ıgi isterge uıytqy bolyp júrsizder. Otanshyl azamattardyń arqasynda elimiz turaqty damyp keledi. Barshańyzǵa shynaıy rızashylyǵymdy bildiremin. Búgin birshama ózekti máseleler talqyǵa tústi. Aldaǵy ýaqytta da osylaı bereke-birlikte bolyp, elimizdiń bolashaǵy úshin mańyzdy jumystardy birge atqara beremiz dep senemin, - dep túıindedi Memleket basshysy.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.