Prezıdent Qazaqstan-Sıngapýr rektorlarynyń «Ǵylym men joǵary bilim salasyndaǵy áriptestiktiń jańa shyńy» atty forýmyna qatysty
SINGAPÝR. KAZINFORM - Qasym-Jomart Toqaev forým qatysýshylaryna iltıpat bildire otyryp, bilim men ǵylymdy damytý elimizdegi memlekettik saıasattyń negizgi basymdyǵy sanalatynyn atap ótti.
– Búgingi forýmnyń eki el yntymaqtastyǵy úshin mańyzy zor. Bul shara Qazaqstan men Sıngapýrdyń bilim jáne ǵylymı-zertteý salalaryndaǵy yqpaldastyǵyn budan da joǵary deńgeıge shyǵarýdy kózdeıdi. Keshe Sıngapýrdyń Prezıdentimen jáne Premer-mınıstrimen ǵylym, bilim, halyqaralyq baılanystar sııaqty ekijaqty yntymaqtastyqtyń keń aýqymdy máseleleri boıynsha óte mazmundy kelissózder júrgizdim. Qazaqstannyń barynsha ashyq, turaqty naryqtyq ekonomıkaǵa kóshýi qarqyndy jáne ornyqty bilim berý standarttary men tsıfrlyq transformatsııany qajet etedi, – dedi Memleket basshysy.
Qasym-Jomart Toqaev Qazaqstanda sheteldik jetekshi ýnıversıtetterdiń fılıaldaryn ashý, halyqaralyq ınstıtýttarmen birlesip udaıy zertteý jumystaryn júrgizý úshin elimizge dáıekti tásil qajet ekenin aıtty.
– Sońǵy birneshe jylda biz bedeldi 19 ýnıversıtetpen strategııalyq alıans qurdyq. AQSh, Ulybrıtanııa, Reseı jáne Germanııa ýnıversıtetteri elimizde óz fılıaldaryn ashty. Sondaı-aq Qytaı, Túrkııa, Italııa jáne jáne basqa da memleketterdiń ýnıversıtetteri Qazaqstanǵa qyzyǵýshylyq tanytyp otyr, – dedi Prezıdent.
Qasym-Jomart Toqaev keshe Qazaqstan men Sıngapýrdyń tıisti vedomstvolary arasynda Joǵary bilim berý salasyndaǵy yntymaqtastyq týraly memorandýmǵa qol qoıylǵanyn aıtty.
– Bul dınamıka basqa da birqatar qujatty qabyldaý, sonyń ishinde Nanıan tehnologııalyq ýnıversıtetimen Ózara túsinistik týraly memorandýmǵa qol qoıý arqyly jalǵasady. Bul memorandým Qazaqstan úshin mańyzy zor sý resýrstaryn basqarý salasyndaǵy yntymaqtastyqqa baǵyttalǵan. Sý – aýyl sharýashylyǵynan ónerkásipke, densaýlyq saqtaýdan qorshaǵan ortaǵa deıingi ómirimizdiń barlyq aspektisine áser etetin óte mańyzdy resýrs. Sý resýrstaryn tıimdi basqarýdyń ornyqty damý men ekonomıkalyq turaqtylyq úshin máni zor, – dedi Qasym-Jomart Toqaev.
Memleket basshysy Qazaqstannyń «Bolashaq» baǵdarlamasy arqyly Sıngapýrǵa zertteýshiler men ǵalymdardy jiberýge nıetti ekenin aıtty. Onyń aıtýynsha, atalǵan baǵdarlama júzege asyryla bastaǵannan beri 12 myńnan astam qazaqstandyq stýdent álemniń úzdik ýnıversıtetterinde bilim alý múmkindigine ıe boldy. Onyń ishinde 72 otandasymyz Sıngapýrda oqyǵan.
– Áli de kóptegen qazaqstandyq stýdent sizderdiń ǵajap elińizde tájirıbe almasý, bilim alý múmkindigine ıe bolaryna senimdimin. Jyl saıyn biz zertteý jumystaryn júrgizýge 500 stıpendııa bólemiz. Sıngapýrǵa keletin qazaqstandyq ǵalymdar sanynyń kóbeıe túskenin qalaımyz. Bilim men ǵylym – progress pen ınnovatsııanyń negizi. Osy salalarǵa kóńil bóle otyryp, biz elimizdiń bolashaǵyna ınvestıtsııa salamyz. Sıngapýrmen aradaǵy seriktestik halyqaralyq yntymaqtastyqtyń damýǵa jáne halyqtarymyz úshin múmkindikterge jol ashýǵa yqpal etetinin kórsetedi, – dedi Qasym-Jomart Toqaev.
Forýmda Sıngapýrdyń Bilim mınıstri Muhammed Malıkı Osman jáne Sıngapýr ulttyq ýnıversıtetiniń prezıdenti, professor Tan Eng Chıe sóz sóıledi.
Sharaǵa Qazaqstan men Sıngapýrdyń joǵary oqý oryndary men ǵylymı ortalyqtarynyń 150-den astam ókili qatysty.
