Prezıdent Qasym-Jomart Toqaev Qatar Syrtqy ister mınıstrimen kelissóz júrgizdi
DOHA. KAZINFORM – Prezıdent Qasym-Jomart Toqaev Qatar Memleketiniń Premer-mınıstri – Syrtqy ister mınıstri sheıh Muhammed ben Abdýlrahman Ál Tánımen kelissóz júrgizdi. Bul týraly Aqordanyń baspasóz qyzmeti habarlady.
Qasym-Jomart Toqaev qonaqjaılyq kórsetkeni úshin Qatar Memleketiniń Premer-mınıstrine alǵys aıtty. Sonymen birge Qazaqstan men Qatar arasyndaǵy qarym-qatynasty joǵary baǵalaıtynyn atap ótip, búgin qol jetkizgen kelisimder seriktestikti jańa deńgeıge kóterýge tyń serpin beretinine senim bildirdi.
«Osy sapardy daıyndaýǵa atsalysqanyńyz úshin Sizge shyn júrekten rızashylyǵymdy bildirgim keledi. Sapar shynymen sátti boldy. Bizdiń qarym-qatynasymyzǵa tyń serpin beretin qujattar toptamasyna qol qoıyldy. Joǵary Mártebeli Qatar Ámirine aıtqanymdaı, biz ózara baılanystardy eki el arasyndaǵy strategııalyq seriktestik deńgeıine kóterdik. Bul óte úlken jetistik dep sanaımyn. Men osyndaı nátıjege qol jetkizgenimizge qýanyshtymyn. Biraq biz munymen shektelip qalmaı, alǵa qadam basyp, ózara yntymaqtastyqtyń jańa múmkindikterin qarastyrýymyz kerek», – dedi Qazaqstan Prezıdenti.
Qasym-Jomart Toqaevtyń aıtýynsha, ekonomıkalyq baılanystar birlesken kúsh-jigerdiń negizgi tiregine aınalýǵa tıis. Qatar Premer-mınıstri saparmen kelgeni úshin Qazaqstan Prezıdentine alǵys aıtyp, sońǵy jyldary memleketter arasyndaǵy ekijaqty qatynastardyń aıtarlyqtaı jandanǵanyn atap ótti.
«Biz sońǵy jyldary buryn-sońdy bolmaǵan jáne aıtarlyqtaı jetistikterge qol jetkizdik. Ózińiz aıtqandaı, bul óz-ózinen bola salǵan dúnıe emes. Odan da úlken jetistikterge jetý úshin jumysty jalǵastyrý qajet. Elderimiz arasyndaǵy qarym-qatynastardyń strategııalyq seriktestik deńgeıine kóterilgenine óte qýanyshtymyn. Eki eldiń mol áleýeti bar dep sanaımyz», – dedi sheıh Muhammed ben Abdýlrahman Ál Tánı.
Qazaqstan Prezıdenti eki el úkimetterin saýda-sattyq qarqynyn arttyrý úshin naqty ekonomıkalyq máselelerge nazar aýdarýǵa shaqyrdy.
Qasym-Jomart Toqaev «Orta dáliz» retinde tanymal Transkaspıı halyqaralyq kólik baǵytyn damytýǵa zor úmit artyp otyrǵanyna toqtaldy. Sondaı-aq Shyǵanaq aımaǵynyń úlken naryǵyna keń jol ashýǵa jáne jańa tranzıttik baǵyttardy qarastyrýǵa basa mán beretinin jetkizdi. Memleket basshysy Qatar kompanııalaryn Qazaqstandaǵy iri ınfraqurylymdyq jobalardy birlese júzege asyrýǵa shaqyrdy.
Sonymen qatar kelissóz barysynda aýyl sharýashylyǵy, tsıfrlandyrý, energetıka salalaryna qatysty ózekti máseleler talqylandy.
Aıta keteıik, Prezıdent Qasym-Jomart Toqaev Qatarǵa memlekettik saparmen bardy.
Sonymen qatar Memleket basshysy Qatar Ámiriniń «Diwan Amiri» saraıyna bardy. Rezıdentsııada Qazaqstan Prezıdentin saltanatty túrde qarsy alý rásimi ótti.
Prezıdent Qatar Ámirimen kelissóz júrgizdi.
Prezıdent Qasym-Jomart Toqaev pen Qatar Ámiri birqatar qujatqa qol qoıdy.
Prezıdentke Qatar Memleketiniń negizin qalaǵan sheıh Djasım ben Muhammed ben Tánıdiń qylyshy tabystaldy.
