Prezıdent Gennadıı Golovkındi І dárejeli «Barys» ordenimen marapattady
ASTANA.KAZINFORM — Qasym-Jomart Toqaev Gennadıı Golovkındi Aqordada qabyldap, World Boxing halyqaralyq federatsııasynyń prezıdenti bolyp saılanýymen quttyqtady. Bul týraly Aqorda málim etti.
Búgin sondaı-aq Qasym-Jomart Toqaev Gennadıı Golovkındi І dárejeli «Barys» ordenimen marapattady.
Aıta keteıik, Memleket basshysy búginde sporttyq mansabyndaǵy jańa kezeńge aıaq basqan Gennadıı Golovkındi World Boxing federatsııasynyń prezıdenti bolyp saılanýymen quttyqtap, jumys endi ǵana bastalǵanyn aıtqan edi. Aldynda atqaratyn qyrýar sharýa turǵanyn, sondaı-aq onyń jahandyq deńgeıdegi sporttyq qurylymdy basqaryp otyrǵan alǵashqy qazaqstandyq ekenin aıtqan bolatyn. Prezıdent onyń kásibı biliktiligi uıymdy jańa beleske kóterip, boks kókjıegin keńeıtetinine senimdi ekenin alǵa tartty.
Gennadıı Golovkın eńbegin joǵary baǵalaǵany, senim artyp, qoldaý kórsetkeni úshin Prezıdent Qasym-Jomart Toqaevqa alǵys aıtty. Sondaı-aq boksty odan ári damytýǵa, osy sport túriniń elimizdegi jáne halyqaralyq deńgeıdegi bedelin nyǵaıtýǵa daıyn ekenin jetkizdi.