Prezıdent Energetıkalyq keńes jumysyna ózgeris engizdi
ASTANA. KAZINFORM — Memleket basshysy Qasym-Jomart Toqaev «QR Prezıdentiniń janyndaǵy Energetıkalyq keńes týraly» erejege ózgeris engizetin Jarlyqqa 11 qarashada qol qoıdy.
Atap aıtqanda, qujatta keńes otyrystary qajettiligine qaraı, Keńes tóraǵasy aıqyndaıtyn merzimderde, biraq jarty jylda bir retten sıretpeı ótkiziletini jazylǵan.
Keńes tóraǵasynyń sheshimi boıynsha máselelerdi syrttaı daýys berý arqyly shyǵarýǵa jáne qaraýǵa jol beriledi. Syrttaı daýys berý qaǵaz jetkizgishte júrgiziledi. «Qyzmet babynda paıdalaný úshin» degen belgisi bar, sondaı-aq memlekettik qupııalardy qamtıtyn jobalar boıynsha daýys berý memlekettik qupııalardy qorǵaý jónindegi talaptar saqtala otyryp júzege asyrylady.
— Keńes músheleriniń syrttaı daýys berý merzimi daýys berý úshin sheshimniń jobasy boıynsha materıaldar taratylǵan kúnnen bastap bir jumys kúninen aspaýǵa tıis. Syrttaı daýys berýge jiberilgen sheshimniń jobasy boıynsha eskertýler bolǵan jaǵdaıda, Keńes músheleri syrttaı daýys berý merzimi aıaqtalǵanǵa deıin Keńestiń jumys organyna jazbasha túrde habar beredi, — delingen qujatta.
Belgilengen merzimde jaýap usynylmaǵan jaǵdaıda, Keńes múshesi «ádepki qalpy boıynsha» sheshimniń jobasyn qabyldaýdy qoldap daýys berdi dep sanalady. Keńestiń otyrysy, eger onyń músheleriniń keminde jartysy otyrysqa qatyssa, zańdy bolyp sanalady.
Sonymen qatar, Keńes músheleriniń óz ókilettikterin ózge laýazymdy adamdarǵa berýine jol berilmeıdi.
— Keńestiń sheshimderi ashyq nemese syrttaı daýys berý arqyly otyrysqa qatysyp otyrǵan nemese syrttaı daýys berýge qatysqan Keńes músheleriniń jalpy sanynyń kópshilik daýsymen qabyldanady. Keńestiń sheshimderi usynymdyq sıpatta bolady. Daýystar teń bolǵan kezde, tóraǵalyq etýshiniń daýysy sheshýshi bolady. Keńestiń músheleri ózderiniń erekshe pikirin jazbasha túrde bildirýge quqyly, ol hattamaǵa qosa beriledi, — dep atalyp ótken Jarlyqta.
Osy Jarlyq qol qoıylǵan kúninen bastap qoldanysqa engiziledi.
Aıta keteıik, Memleket basshysy Alataý qalasyna arnaýly mártebe berý týraly Jarlyqqa qol qoıdy.