Prezıdent: elimizde qoqys óńdeıtin kásiporyndar salý qajet
ALMATY. KAZINFORM – Prezıdent Qasym-Jomart Toqaev Almatyda ǵalymdarmen kezdesý barysynda BUU aıasynda 2026 jyly elimizde Aımaqtyq klımattyq sammıt ótetinin málimdedi. Bul týraly Aqordanyń baspasóz qyzmeti habarlady.
Prezıdent sammıt klımattyń ózgerýine qarsy kúreste halyqaralyq qoǵamdastyqtyń kúsh-jigerin biriktirýge eleýli úles qosatynyna senim bildirdi. Sonymen birge qoǵamda ekologııalyq mádenıet qalyptastyrý jáne qorshaǵan ortaǵa qamqorlyqpen qaraý sııaqty qundylyqtardy nasıhattaý mańyzdy.
«Qazirgi jaǵdaıda ekologııalyq oılaý qabileti barlyq bilim berý jáne ǵylymı baǵdarlamalardyń negizi bolýy kerek dep sanaımyn. Tabıǵat resýrstaryna jaýapkershilikpen qaraý jáne qorshaǵan ortaǵa qamqorlyq tanytý qoǵamdyq sananyń quramdas bóligine aınalýy qajet.
Bıyl elimizde «Taza Qazaqstan» aktsııasy bastaldy. Bul – jaı naýqan emes, bul – halqymyzdyń kózqarasyn, bolmysyn ózgerte alatyn óte mańyzdy joba. Aýqymdy ekologııalyq bastamaǵa, ásirese, jastar belsene atsalysty. Bul da – jaqsy úrdis. Az ýaqyt ishinde 2,5 mıllıonnan astam aǵash egildi, 200-den astam ózen-kóldiń jaǵasy tazartyldy. Osy bastama turaqty jalǵasyp, jaqsy dástúrge aınalýy qajet. Bul aktsııa tal egip, qoqys jınaýmen shektelmeýge tıis. Atqarylatyn basqa da sharýa kóp. Eń bastysy, barlyǵy shyn nıetpen jasalýy kerek. «Taza Qazaqstan» aktsııasy aımaqtarda qalaı júrip jatqanyn men muqııat qadaǵalap otyramyn. Muny, eń aldymen, ákimderden talap etemin. Bárin ákimge júktep, qarap otyrýǵa da bolmaıdy. Jaz maýsymy bastaldy, endi ishki týrızm jandana túsedi. Demalýǵa shyqqan ár azamat tabıǵatqa janashyrlyqpen qaraýǵa tıis. Tazalyqtyń basty kepili – aınalany lastamaý. Bul – barshaǵa ortaq mindet», - dedi Prezıdent.
Memleket basshysy qoqys óńdeıtin kásiporyndar salý qajet ekenin aıtty. Onsyz qalalarymyz taza bolmaıdy.
«Jalpy, «Taza Qazaqstan» degen sózdi keń aýqymda túsingen jón dep sanaımyn. Tazalyq eń áýeli adamnyń sana-seziminen bastalýǵa tıis. Peıili taza adamnyń isi berekeli bolady. Biz qazir ult sapasyn jaqsartýǵa basa mán berip otyrmyz. Men Atyraýda ótken Quryltaıda jańa qundylyqtar qalyptastyrý máselesine toqtaldym. Qazir memleket pen qoǵamnyń arasynda osyǵan qatysty ortaq ustanym bar. Bul qundylyqtar oqý oryndarynyń tárbıe jumysyna arqaý bolýy kerek. Ókinishke qaraı, qoǵamda ozbyrlyq pen qatygezdik tyıylmaı tur. Mundaı jaǵymsyz úrdis, ásirese, jastar arasynda beleń alýda. Biz máseleniń túp-tamyry tereńde jatqanyn ashyq aıtýymyz kerek. Áleýmettik jeli balalardyń minez-qulqyna keri áser etip jatqany sózsiz. Biraq bárin áleýmettik jelige jaba salýǵa bolmaıdy. Bilim berý júıesinde kemshilikter kóp. Otbasy tárbıesinde de olqylyq bar. Árbir ata-ana balasyna durys tálim-tárbıe berýi qajet. Úlkender óziniń kúndelikti is-áreketimen balalarǵa úlgi bolýy kerek. Elimizdegi balalardyń bári qorshaǵan álemmen úılesimdi, ata-anasy men jaqyndarynyń súıispenshiligine jáne meıirimine bólenip ósýi mańyzdy. Ol úshin, eń aldymen, otbasyndaǵy zorlyq-zombylyq syndy qarańǵylyqtyń, moraldyq degradatsııanyń órshýin túp-tamyrymen joıý qajet», - dedi Qasym-Jomart Toqaev.
