Prezıdent el damýyndaǵy JI-diń strategııalyq rólin atady
ASTANA. KAZINFORM — Prezıdent Qasym-Jomart Toqaev jasandy ıntellektini damytý jónindegi keńestiń alǵashqy otyrysynda ekonomıka, memlekettik basqarý, ǵylym jáne bilim berý salalarynda JI-di paıdalanýdyń mańyzdylyǵyn atap ótti.
— Biz qazir iri ózgerister dáýirinde ómir súrip kelemiz. Jasandy ıntellekt qazirdiń ózinde ekonomıkany, memlekettik basqarýdy, ǵylymdy jáne árıne bilim berýdi qalyptastyryp otyr. Bul tehnologııany qalaı qoldanatynymyz bizdiń básekege qabilettigimizdi, tipti uzaqmerzimdi bolashaqtaǵy egemendigimizdi aıqyndaıdy, — dedi Memleket basshysy.
Prezıdent bıyl halyqqa arnaǵan Joldaýynda aldaǵy úsh jylda eldi tolyqqandy tsıfrlyq qoǵamǵa aınaldyrý jóninde strategııalyq mindet qoıǵanyn eske saldy.
Qazaqstanda jasandy ıntellekt eldi transformatsııalaýdyń negizgi faktory retinde qarastyrylady. Memlekettiń maqsaty — tek óńirde nemese halyqaralyq deńgeıde kóshbasshy bolý ǵana emes, Qazaqstannyń ozyq ári órkenıetti qoǵam retinde damýyna jol ashý.
Prezıdent Qytaı, AQSh jáne BAÁ elderiniń mysalyn keltirip, olar JI-di damytý strategııalaryn júzege asyryp, jahandyq kóshbasshy ataný úshin qomaqty qarjy bólip otyrǵanyn atap ótti.
— Jasandy ıntellekt — jahandyq ekonomıkalyq básekege qabilettiliktiń negizgi faktory. Qazaqstan bul protsesten tys qala almaıdy. Sondyqtan memlekettik basqarýdyń barlyq sektoryna JI-di úılestirý úshin Jasandy ıntellekt mınıstrligi quryldy, — dedi Qasym-Jomart Toqaev.
Sonymen birge, Memleket basshysy el úshin negizgi basymdyq — ulttyq tehnologııalardy damytý jáne otandyq mamandardy daıarlaý ekenin aıtty. Sebebi tehnologııalyq egemendik pen bilim berý osy protseste basty ról oınaıdy.
— Basty maqsat — otandyq tehnologııalardy jan-jaqty damytý jáne elde myqty IT-mamandardy daıarlaý. Sondyqtan eń aldymen bilim salasyna basymdyq berýimiz qajet, — dep túıindedi Prezıdent.
Aıta keteıik, elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy ótti.
Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.