Prezıdent: Bilim men ǵylym – álemdi ózgerte alatyn eń basty kúsh
ASTANA. KAZINFORM – Memleket basshysy «Qazaqstan – akademııalyq bilim aımaǵy» strategııalyq seriktester forýmynda sóz sóıledi. Bul týraly Aqordanyń baspasóz qyzmeti habarlady.
Prezıdent bilim jáne ǵylymdy eshqandaı shekara talǵamaıtyn, barlyq elge ortaq strategııalyq mańyzy aıryqsha sala retinde atap, búgingi forým sonyń aıqyn dáleli ekenine nazar aýdardy.
– Bul – shyn máninde óte mańyzdy jıyn, jahandyq bilim men ǵylymnyń damýy týraly asa qundy oı-pikirler aıtylatyn, boljamdar jasalatyn biregeı alań. Osyǵan oraı kesheden beri álemdegi jetekshi joǵary oqý oryndarynyń basshylary jáne ókilderi Astanada bas qosyp, pikir almasyp jatyr. Halyqaralyq deńgeıdegi ǵalymdar men sarapshylar elordamyzda mańyzdy máselelerdi talqylaýda. Búgin de akademııalyq bilim álemindegi bedeldi joǵary oqý oryndarynyń jetekshileri tereń maǵynaly oılaryn ortaǵa saldy. Barshańyzǵa shynaıy rızashylyǵymdy bildiremin, - dedi Qasym-Jomart Toqaev.
Prezıdenttiń pikirinshe, bilim men ǵylym – álemdi ózgerte alatyn eń basty kúsh, al ýnıversıtet – ozyq oılar men jańa ıdeıalardyń ordasy, ǵylymı izdenis ortasy.
– Qazir adamzat túbegeıli ózgerister dáýirine qadam basqan kezde bilim ordalary zaman talabyna saı ozyq bolýǵa tıis. Onsyz eshqandaı damý da, órkendeý de bolmaıtyny anyq. Qazaqstan bilim-ǵylym júıesin damytýǵa aıryqsha mán berip otyr. 2019 jyldan beri osy salaǵa bólinetin qarjy úsh ese ulǵaıdy. Elimizde joǵary oqý oryndarynyń derbestigi artyp keledi, zertteý ýnıversıtetteri kóbeıýde. «Ǵylym jáne tehnologııalyq saıasat týraly» jańa zań qabyldandy. Prezıdent janynan Ǵylym jáne tehnologııalar jónindegi ulttyq keńes quryldy. Memleket ǵalymdarǵa, ásirese, jas zertteýshilerge barynsha qoldaý kórsetýde. Joǵary bilimniń barsha azamatqa birdeı qoljetimdi bolýy – óte mańyzdy mindet, - dedi Memleket basshysy.
Sondaı-aq Qasym-Jomart Toqaev óskeleń urpaqtyń sapaly bilim alýy úshin memleket tarapynan jasalyp jatqan qamqorlyqqa toqtaldy.
– Elimizde 2024 jyldan bastap «Ulttyq qor – balalarǵa» baǵdarlamasy júzege asyrylyp jatyr. Soǵan sáıkes Ulttyq qordyń jyl saıynǵy ınvestıtsııalyq tabysynyń 50 paıyzy balalardyń esepshotyna salynady, ıaǵnı Qazaqstandaǵy ár bala 18 jasqa deıin Ulttyq qordan qarjy alyp turady. Atalǵan qarajatty merziminen buryn qoldanýǵa bolmaıdy. Balalar kámelet jasqa tolǵannan keıin jınaqtalǵan qarjyny baspana nemese bilim alýǵa jumsaı alady. Sonymen qatar bes jastan asqan balalarǵa arnalǵan «Keleshek» biryńǵaı jınaqtaý júıesi iske qosyldy. Bul júıede ata-analardyń erikti salymy, memleket tarapynan bólinetin bastapqy bilim berý kapıtaly, jyl saıynǵy memlekettik syıaqy jáne ınvestıtsııalyq tabys jınaqtalady. Jobalardyń negizgi maqsaty – bir, bul – jas urpaqtyń sapaly bilim alýyna jaǵdaı jasaý. Budan bólek, jastarǵa paıyzsyz bilim nesıeleri jáne túrli granttar berilýde. Joǵary bilim berý salasynyń ınfraqurylymy jańǵyrtylyp jatyr, jańa oqý ǵımarattary (kampýstar) boı kóterýde. Aımaqtarda joǵary oqý oryndarynyń janynan stýdentterge arnalǵan jataqhanalar salynýda, - dedi Prezıdent.
Eske sala keteıik, buǵan deıin Prezıdenttiń «Qazaqstan – akademııalyq bilim aımaǵy» halyqaralyq forýmyna qatysyp jatqanyn jazǵanbyz.