Prezıdent Belarýs Premer-mınıstri Aleksandr Týrchındi qabyldady
ASTANA. KAZINFORM — Memleket basshysy Belarýs Premer-mınıstri Aleksandr Týrchındi qabyldady. Kezdesýde ekijaqty saýda-ekonomıkalyq yntymaqtastyq, ónerkásip kooperatsııasy jáne mádenı-gýmanıtarlyq yqpaldastyq perspektıvasy talqylandy. Bul týraly Aqorda málim etti.
Qasym-Jomart Toqaevtyń pikirinshe, Aleksandr Týrchınniń Astanaǵa jasaǵan alǵashqy resmı sapary Qazaqstan men Belarýs arasyndaǵy strategııalyq seriktestiktiń aıryqsha sıpatyn rastaıdy, sondaı-aq ekijaqty yqpaldastyqty odan ári damytýǵa nıetti ekenin kórsetedi.
— Sizdiń saparyńyz memleketterimiz arasyndaǵy yntymaqtastyqty damytý turǵysynan óte mańyzdy dep sanaımyz. Elderimizdiń saýda baılanystary mıllıard dollarǵa jýyqtap, tabysty damyp keledi. Meniń bilýimshe, Qazaqstan — Belarýstiń ekinshi saýda seriktesi. Jalpy, Sizdiń elińiz ben halqyńyzdyń tól mádenıetine erekshe qurmetpen qaraımyz. Oraıly sátti paıdalana otyryp, Prezıdent Aleksandr Lýkashenkoǵa sálemimdi joldaǵym keledi. Tabysty yqpaldastyǵymyzdy naqty nátıjelermen jalǵastyrýǵa beıilmiz, — dedi Qazaqstan Prezıdenti.
Aleksandr Týrchın ózara tıimdi dıalogtyń joǵary qarqynyn saqtaýǵa jáne memleketter basshylary alǵa qoıǵan mindetterdi naqty iske asyrýdy úılestirýge múddeli ekenin jetkizdi.
– Sizge Prezıdent Aleksandr Grıgorevıch Lýkashenkonyń ystyq yqylasyn jetkizgim keledi. Kúni keshe biz keńinen áńgimelestik, oǵan Qazaqstanǵa saparymnyń baǵdarlamasy jóninde jan-jaqty aqparat berdim. Qazaqstannyń damý jolyn jiti baqylap otyramyz. Uzaq jyldardan beri elińizdiń ekonomıkalyq ósimi turaqty kórsetkishke ıe. Sondyqtan qazirgi tabystaryńyzǵa shynaıy qýanamyz. Ózińiz atap ótkendeı, eki el arasyndaǵy taýar aınalymy ósip keledi, – dedi Belarýs Premer-mınıstri.
Bıyl 8 aıdyń ishinde ózara saýda kólemi byltyrǵymen salystyrǵanda 20 paıyzǵa artty.
Ónerkásip kooperatsııasy aıasynda quny 204 mıllıon dollar bolatyn 12 joba júzege asty. Taǵy 3 joba pysyqtalyp jatyr.
Aıta keteıik, buǵan deıin Memleket basshysy Aljır Prezıdentine quttyqtaý jedelhatyn joldaǵan bolatyn.