Prezıdent Bas prokýratýrada jıyn ótkizdi

ASTANA. KAZINFORM  — Memleket basshysy elimizde aýqymdy ózgerister jasalyp jatqanyn jáne aldymyzda Konstıtýtsııalyq reforma júrgizý, múlde jańa saıası júıege qadam basý mindeti turǵanyn aıtty. Bul týraly Aqordanyń baspasóz qyzmeti habarlady. 

Sonymen qatar jańa dáýirde barlyq salaǵa tsıfrlandyrý men jasandy ıntellektini jappaı engizý jumysymen belsendi túrde aınalysý qajet ekenin atap ótti. 

— Keıbir shet elderde bolyp jatqan qazirgi óte kúrdeli ahýaldy kórip, bul saıasatymyzdyń durystyǵyna bárimizdiń kózimiz jetip otyr, oǵan eshqandaı kúmán joq. Zań men tártip memlekettik saıasatymyzdyń negizgi qaǵıdaty retinde qabyldanýy kerek, bul qaǵıdatty jańa Konstıtýtsııamyzǵa mindetti túrde engizý qajet dep sanaımyn. Sebebi bul eshqashan ózektiligin joǵaltpaıtyn, ómirsheń qaǵıdat ekeni daýsyz. Bas prokýratýranyń osy saladaǵy róli asa mańyzdy. Prokýratýra qyzmetkeriniń zańnyń buzylýyna beıtarap, selqos qaraýǵa quqyǵy joq, — dedi Prezıdent.

Memleket basshysy quqyq qorǵaý júıesin tsıfrlandyrý úderisi birkelki emes, ıaǵnı ár jerde árqalaı ekenin aıtty.

— Ár mekeme tsıfrlyq júıesin óz betimen damytýda. Bul sharýa júıesiz júrgizilip jatyr. Birtutas júıe joq. Mysaly, keıbir organdar tsıfrlyq tásilderdi utymdy qoldanyp jumys isteýde. Al keıbiri durys amal-tásil taba almaı, qyrýar qarjy jumsap júr. Bul, basqa sózben aıtqanda, naǵyz jymqyrý. Sondyqtan qarajatty orynsyz jumsap, jańa dúnıe jasaýdyń qajeti joq. Úkimetke qoldanystaǵy barlyq tsıfrlyq sheshimderdi saralap, tekserip, olardyń tıimdiligin arttyrýdy tapsyramyn. Kúshtik qurylymdarǵa arnalǵan túsinikti qurylymy bar jáne tehnologııalyq standarttary birkelki biryńǵaı tsıfrlyq ekojúıe jasalýǵa tıis, — dedi ol.