Prezıdent Balalar shuǵyl medıtsınalyq járdem ortalyǵyn aralap kórdi
ASTANA. KAZINFORM – Memleket basshysy Qasym-Jomart Toqaev Balalar shuǵyl medıtsınalyq járdem ortalyǵynyń jańa korpýsymen tanysty.
Jańa ǵımarat Emergency halyqaralyq standartyna saı salynǵan ári trıaj júıesine sáıkes táýligine 500-den asa naýqasty qabyldaı alady. Ortalyqta 26 tósek orynǵa eseptelgen reanımatsııa jáne qarqyndy terapııa bólimi, dıagnostıka bólimi jáne 4 operatsııa blogy bar.
Prezıdentke ortalyqtyń zamanaýı medıtsınalyq apparattarmen jabdyqtalǵan dıagnostıka kabınetteri, nárestelerge arnalǵan qarqyndy terapııa bólimshesi jáne operatsııa bólmeleri tanystyryldy.
Almaty qalasy ákiminiń orynbasary Ásem Núsipovanyń aıtýynsha, 1965 jyly negizi qalanǵan qalalyq balalar aýrýhanasy S.Asfendııarov atyndaǵy Qazaq ulttyq medıtsınalyq ýnıversıteti pedıatrııa kafedrasynyń klınıkalyq bazasy sanalady. Aýrýhanada tek Almaty qalasynyń ǵana emes, búkil Qazaqstannyń balalary josparly em-dom alady. Respýblıka boıynsha tek osy klınıkada jańa týǵan nárestelerde kezdesetin asqazan artrezııasy, kóket jaryǵy (dıafragmalnaıa gryja), rahıshızıs, gastroshızıs sekildi týabitti dertterdi hırýrgııalyq jolmen emdeý tásilderi jolǵa qoıylǵan.
Sońǵy úsh jylda bul aýrýhanada emdelýshiler sany 30 paıyzǵa artqan. Sol sebepti qazir Balalar shuǵyl medıtsınalyq járdem ortalyǵynyń negizgi ǵımaratyn jańartý jáne rekonstrýktsııalaý jospary ázirlenip jatyr. Soǵan sáıkes eski korpýstardyń bári kúrdeli jóndeýden ótkizilip, qosymsha ońaltý, otolarıngologııa, aımaqtyq oftolmologııa ortalyqtary jáne jaq-bas súıek hırýrgııasy bólimsheleri ashylmaq. Nátıjesinde statsıonardaǵy tósek-oryn sany 350-den 470-ke deıin artady. Sondaı-aq kórsetiletin medıtsınalyq qyzmetterdiń túri kóbeıip, halyqaralyq standarttar deńgeıindegi sapany qamtamasyz etý múmkindigi paıda bolady.
Memleket basshysy Qasym-Jomart Toqaev medıtsınalyq mekemeniń qyzmetine tabys tilep, 2 reanımobıl men ınteraktıvti taqtany syıǵa tartty.
