Prezıdent: Ázerbaıjan – Qazaqstan úshin erekshe el, baýyrlas memleket
ASTANA. KAZINFORM — Qasym-Jomart Toqaev pen Ilham Álıevtiń tóraǵalyǵymen Qazaqstan Respýblıkasy men Ázerbaıjan Respýblıkasynyń Joǵary memleketaralyq keńesiniń ekinshi otyrysy ótti. Jıynnyń kún tártibinde kólik, logıstıka, tsıfrlandyrý, otyn-energetıka kesheni, sondaı-aq mádenı-gýmanıtarlyq salalardaǵy yntymaqtastyq máseleleri qarastyryldy. Memleket basshysy mundaı format Qazaqstan-Ázerbaıjan qatynastarynyń erekshe sıpatyn pash etetinin atap ótti. Bul týraly Aqorda málim etti.
— Keńes ekijaqty yntymaqtastyqtyń barlyq baǵyty boıynsha ortaq sheshim shyǵaratyn tıimdi alańǵa aınaldy. Ázerbaıjan — Qazaqstan úshin erekshe el, baýyrlas memleket. Bizdi ortaq tarıhı tamyrlastyq, baı rýhanı-mádenı mura biriktiredi, mentalıtetimiz ben ustanymdarymyz uqsas. San qyrly yntymaqtastyǵymyz osy myzǵymas qundylyqtardyń negizinde damyp keledi. Ilham Geıdar oglý, Sizdiń Qazaqstanǵa jasaǵan memlekettik saparyńyzdyń mańyzy zor. Sizdiń saparyńyz eki el arasynda Strategııalyq seriktestik jáne odaqtastyq týraly shartqa qol qoıylǵanyna 20 jyl tolǵan sátte ótip jatyr. Munyń sımvoldyq máni bar. Osy jyldar ishinde biz belsendi saıası dıalogty jolǵa qoıyp, saýda-ekonomıkalyq jáne mádenı-gýmanıtarlyq yqpaldastyqtyń úzdiksiz damýyna berik sharttyq-quqyqtyq negiz qaladyq. Osynaý jan-jaqty, ári dáıekti jumysty eki el azamattary da qoldap otyr, — dedi Qazaqstan Prezıdenti.
Memleket basshysy qazaq-ázerbaıjan qatynastarynyń joǵary deńgeıge jetýine, eń aldymen, Prezıdent Ilham Álıev eleýli úles qosqanyna nazar aýdardy.
— Sizdiń turaqty qoldaýyńyzdy joǵary baǵalaımyn. Búgingi Ázerbaıjannyń aıtýly jetistikteri Sizdiń qýatty kóshbasshylyǵyńyzben tikeleı baılanysty. Ázerbaıjan men Armenııa arasyndaǵy qaqtyǵysty beıbit jolmen retteý týraly deklaratsııanyń tarıhı mańyzy zor ekenin arnaıy atap ótkim keledi. Siz saıası erik-jiger men strategııalyq kóregendilik tanytyp, kúrdeli túıtkilderdi sheshýdiń jáne keleshek urpaq taǵdyry úshin jaýapkershilik arqalaýdyń parasatty jolyn nusqadyńyz. Eki el arasynda qol jetkizilgen ýaǵdalastyq jańa kezeńniń bastaýy retinde búkil aımaqtaǵy jáne óńirden tysqary yntymaqtastyq kókjıegin keńeıtkenine esh kúmán joq. Biz baýyrlas Ázerbaıjannyń jetistigine shyn júrekten qýanamyz, myqty ári progressıvti memleket qurý jolyndaǵy asqaq murattarynyń oryndalýyna tilektespiz. Qazaqstan-Ázerbaıjan qatynastarynyń áleýeti orasan zor. Ony tolyq iske asyrýǵa esh kedergi joq. Oǵan berik saıası senim de, ortaq qundylyqtarymyz da, eń bastysy, halyqtarymyzdy jaqyndastyrýǵa degen shynaıy umtylys ta bar, — dedi Qasym-Jomart Toqaev.
Sondaı-aq Joǵary memleketaralyq keńestiń ekinshi otyrysynda Ázerbaıjan Prezıdenti Ilham Álıev sóz sóıledi.
— Qozǵalǵan máselelerge qatysty kózqarastyń tolyq sáıkes keletini, sondaı-aq odaqtastyq qatynastardy nyǵaıtý nıetimizdiń ortaq ekeni qýantady, — dedi ol.
Aıta keteıik, buǵan deıin qos el Prezıdentterine Orta dálizdi damytý jobasy tanystyryldy.