Prezıdent «Aıka» fılmine qatysty pikir bildirdi

ASTANA. QazAqparat - Búgin Aqordada ótken kezdesýde QR Prezıdenti Nursultan Nazarbaev "Aıka" fılmine qatysty óz pikirin bildirdi, dep xabarlaıdy QazAqparat tilshisi.

«Samal Eslıamova «Aıka» fılminen keıin Kann festıvalinde úzdik áıel róli úshin jeńimpaz atandy. Sol arqyly Qazaqstandy da keńinen tanytty. Al, eń bastysy, sheteldegi mıgranttardyń máselesin sheber kórsete bildi. Qudaıǵa shúkir, Táýelsizdik alǵan 27 jyldyń ishinde qazaqstandyqtar basqa memleketter sııaqty esh jerde qara jumys istegen joq. Samal ol adamdardyń qıynshylyqtaryn úlken talantpen kórsetti. Basqa shyǵarmalaryn asyǵa kútemiz», - dedi N.Nazarbaev.

Aıta keteıik, búgingi kezdesýge Samal Eslıamova da qatysty. Ol aldaǵy josparlary týraly aıtyp, shetelde júrgende týǵan jeriniń aspanyn qatty saǵynatynyn jetkizdi. Kezdesýden keıin ártis jýrnalısterdiń «Juldyz bolǵan qalaı eken?» degen suraǵyna jaýap berdi. Aldaǵy ýaqytta ol túriktiń tarıxı kınosyna da túsýge qarsy emes.