Prezıdent Atyraýǵa bólinetin granttyń ıgerilmeı jatqanyn synady: bul – óte tómen kórsetkish

ATYRAÝ. QazAqparat – Qazaqstannyń irgeli joǵary oqý oryndarynda bilim alý úshin Atyraý oblysyna bólingen 4 myń granttyń 800-ge jýyǵy ǵana ıgerilgen. Bul týraly Memleket basshysy Qasym-Jomart Toqaev Atyraý oblysy jurtshylyǵymen kezdesýinde málim etti, dep habarlaıdy QazAqparat Aqordanyń baspasóz qyzmetine silteme jasaı otyryp.

«Bilim berý jáne mádenıet salasyn damytý qajet. Oblysta apatty jaǵdaıda turǵan jáne úsh aýysymmen oqytatyn mektepter máselesi áli sheshimin tappaı otyr. Balabaqshalar da jetispeıdi. Qazir 17 myńǵa jýyq bala kezekte tur. Bul máseleni sheshýge qajetti qarjy qarastyrylǵan. Sonymen qatar, kelesi jyly«Jaıly mektep» ulttyq jobasymen 11 mektep salynady. Buǵan respýblıkalyq bıýdjetten qarjy bólinedi. Bilim berý ınfraqurylymyn jańǵyrtýǵa qatysty jospardy tolyq oryndaý kerek. Úkimet jáne ákimdik onyń ýaqtyly jáne sapaly júzege asyrylýyn qatań baqylaýǵa tıis. Atyraý oblysynda kásiptik jáne tehnıkalyq bilim beretin 24 mekeme bar. Onda 16 myń stýdent bilim alyp jatyr. Biraq, osy kolledjderdiń túlekteri kóbine jumys taba almaı qınalady. Bul másele ár oblysta bar. Oqý-aǵartý mınıstrligine oblys ákimderimen birlesip, kásiptik-tehnıkalyq oqý oryndaryn eńbek naryǵyna beıimdeý úshin naqty shara qabyldaýdy tapsyramyn», - dedi Qasym-Jomart Toqaev.

Memleket basshysynyń aıtýynsha, Qazaqstannyń irgeli joǵary oqý oryndarynda bilim alý úshin batys aımaǵyndaǵy jastaryna 10 myń grant bólindi, biraq ol tıisti deńgeıde ıgerilmeı otyr.

«Joǵary bilimniń qoljetimdi bolýy, bilim sapasyn arttyrý, jaratylystaný jáne tehnıkalyq baǵyttaǵy ýnıversıtetterdi kúsheıtý asa mańyzdy. Men qyrkúıektegi óz Joldaýymda osyǵan qatysty birqatar mindet júktedim. Meniń bastamammen Atyraýda Reseıdiń Gýbkın atyndaǵy munaı-gaz ýnıversıtetiniń fılıaly ashyldy. Atalǵan ýnıversıtettiń túlekterine eńbek naryǵynda suranys kóp bolady dep senemin.

Meniń tapsyrmammen Qazaqstannyń irgeli joǵary oqý oryndarynda bilim alý úshin batys aımaǵyndaǵy jastaryna 10 myń grant bólindi. Biraq, osy granttarmen oqýǵa túsken bala kóp emes. Men bul týraly keshe Aqtaýda da aıttym. Atyraý oblysyna bólingen 4 myń granttyń 800-ge jýyǵy ǵana ıgerilgen. Bul – óte tómen kórsetkish. Ákimdik quzyrly mınıstrliktermen birlesip, osy másele boıynsha aqparattyq túsindirý jumystaryn júrgizýi qajet», dep atap ótti Memleket basshysy.