Prezıdent Astanaǵa resmı saparmen kelgen Rashıd Meredovti qabyldady
ASTANA. KAZINFORM – Qasym-Jomart Toqaev Astanaǵa resmı saparmen kelgen Túrikmenstannyń Mınıstrler kabıneti tóraǵasynyń orynbasary, Syrtqy ister mınıstri Rashıd Meredovpen kezdesti. Bul týraly Aqordanyń baspasóz qyzmeti habarlady.
Memleket basshysy qazaq-túrikmen qarym-qatynastary barlyq baǵytta dostyq, tatý kórshilik jáne strategııalyq seriktestik rýhynda damyp kele jatqanyna nazar aýdardy.
Qazaqstan Prezıdenti Ashhabad bastamashy bolǵan Beıbitshilik jáne senim jylynyń bastalýymen quttyqtady. Bul Túrikmenstannyń beıtarap saıası ustanymynyń 30 jyldyǵymen qatar kelip otyr.
Qasym-Jomart Toqaev Túrikmenstannyń bitimgershilik bastamalarynyń mańyzy zor ekenin aıtyp, ony tabysty júzege asyrý úshin Qazaqstannyń jan-jaqty qoldaý kórsetýdi jalǵastyra beretinin atap ótti.
Eki el arasynda ekonomıkalyq baılanystar qarqyndy damyp, memleketter múddesine saı keletin ózekti máseleler konstrýktıvti turǵydan ilgerilep keledi.
Rashıd Meredov Memleket basshysyna Túrikmenstan Prezıdenti Serdar Berdimuhamedov pen Túrikmen halqynyń ulttyq kóshbasshysy, Halk Maslahatynyń Tóraǵasy Gýrbangýly Berdimuhamedovtiń ystyq yqylasyn jetkizdi.
Mınıstrdiń aıtýynsha, qazaq-túrikmen yqpaldastyǵy strategııalyq sıpatqa ıe, sonymen qatar berik ári uzaqmerzimdi perspektıvaǵa qurylǵan. Osy rette túrikmen delegatsııasy Ashhabadtyń Astanamen memleketaralyq baılanystardyń barlyq baǵyty boıynsha yntymaqtastyqty odan ári nyǵaıtýǵa nıetti ekenin rastady.
Áńgimelesý barysynda energetıka, kólik-tranzıt jáne mádenı-gýmanıtarlyq salalar boıynsha buǵan deıin joǵary deńgeıde qol jetkizilgen ýaǵdalastyqtardyń júzege asyrylý barysy talqylandy.
Aıta ketsek, Qazaqstan men Túrikmenstan arasyndaǵy taýar aınalymyn 1 mlrd dollarǵa deıin artpaq. Bul týraly Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovpen ótken kelissózden keıin QR Premer-Mınıstriniń orynbasary – Syrtqy ister mınıstri Murat Nurtileý aıtty.