Prezıdent: Alda kúrdeli kezeń kele jatyr

ASTANA. KAZINFORM – Kez kelgen aýqymdy daǵdarystan keıin zor múmkindikterge jol ashylady. Bul týraly Qazaqstan halqy Assambleıasynyń XXHІV sessııasynda Memleket basshysy Qasym-Jomart Toqaev aıtty.

- Taǵy bir másele. Qazirgi kúrdeli jaǵdaıdy jeke múddesine paıdalanǵysy keletin túrli popýlıster men saıasatkersymaqtar bar. El múddesine qastyq oılaǵan ondaı adamdarǵa tutas qoǵam bolyp qarsy turýymyz kerek. Alda kúrdeli kezeń kele jatyr. Ońaı bolmaıdy. Biraq alańdaýǵa esh negiz joq. Men kóp jaǵdaıda «Bul qıyndyq ta artta qalady» dep ashyq aıtamyn. Sol sózimdi osy jerde taǵy qaıtalaǵym keledi. Biz syn-qaterdiń bárin eńserip kelemiz. Bul joly da solaı bolady. Eń bastysy, barynsha jınaqy bolyp, naqty nátıjege umtylýymyz kerek, - dedi Qasym-Jomart Toqaev.

Memleket basshysy kez kelgen aýqymdy daǵdarystan keıin zor múmkindikterge jol ashylatyndyǵyn basa aıtty.

- Sol múmkindikterdi der kezinde ári durys paıdalaný qajet. Óz kúshimizge ǵana arqa súıep, barlyq resýrsty ortaq maqsatqa jumyldyrýymyz kerek. Bos sózge urynyp, baıbalamǵa salynbaı, jasampaz bolǵanymyz abzal. Ár azamattyń boıynda jaýapkershilik sezimi óte joǵary bolýǵa tıis. Qoǵamda ózara tileýlestik bolýy kerek. Ár iste temirdeı tártip bolýy qajet. Sonda elimiz de orasan zor tabysqa jetedi. Barshańyzǵa málim, Zań men tártip – meniń strategııalyq baǵdarymnyń arqaýy. Men ár sóılegen sózimde osy qaǵıdattarǵa arnaıy toqtalamyn. Taza Qazaqstan, Zań men tártip, Adal azamat ıdeıalarynyń ózegi de – osy, - dedi Prezıdent.

Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.