Prezıdent Al Faisal holdıngine Astanada erekshe ǵımarat salýdy usyndy
DOHA. KAZINFORM – Memleket basshysy Al Faisal Holding kompanııasy dırektorlar keńesiniń tóraǵasy Feısal ben Qasym Ál Tánıdi qabyldady. Bul týraly Aqordanyń baspasóz qyzmeti habarlady.
Qazaqstan Prezıdenti Dohaǵa memlekettik saparynyń aıasynda Qatardyń iri bıznes qurylymdarynyń basshylarymen birqatar kezdesý ótkizdi.
Al Faisal Holding kompanııasy dırektorlar keńesiniń tóraǵasy, Qatar kásipkerleri qaýymdastyǵynyń tóraǵasy, Qazaqstanmen iskerlik yntymaqtastyqty úılestirýshi Feısal ben Qasym Ál Tánımen áńgimelesý barysynda ekijaqty ekonomıkalyq jáne ınvestıtsııalyq yqpaldastyqty nyǵaıtý máseleleri talqylandy.
Qasym-Jomart Toqaev Al Faisal kompanııasymen aradaǵy ózara tıimdi seriktestik Qatar bıznesiniń Qazaqstandaǵy úlesin arttyrýǵa jol ashatynyn atap ótti. Onyń pikirinshe, birlesken jumystar jańa ınnovatsııalyq-ınvestıtsııalyq jobalardy júzege asyrýǵa múmkindik beredi.
Kezdesý barysynda qurylys, týrızm jáne qonaq úı bıznesi salalaryndaǵy yntymaqtastyq, sondaı-aq bilim berý baǵyty boıynsha birlesken jobalardy júzege asyrý máseleleri talqylandy.
Al Faisal holdıngine Astanada Qazaqstan men Qatar arasyndaǵy dostyq qarym-qatynastyń sımvolyna aınalatyn aıtýly ǵımarat salý perspektıvasyn qarastyrý usynyldy.
