Prezıdent aqyn qyzdan óleń oqyp berýdi surady
Sózdiń kezegi aqyn Maqpal Tájmaǵambetovaǵa kelgende Memleket basshysy «100 jańa esim» jobasy aıasyndaǵy kezdesýden keıin ony arnaıy shaqyrǵanyn jetkizdi.
«Anadaǵy kezdesýden keıin ádeıi shaqyrdym. Sol maxabbat týraly óleńińdi osy jerde otyrǵan qyzdarǵa taǵy bir ret oqyp bershi», - dep surady N.Nazarbaev.
M.Tájmaǵanbetova óz tilegin bildirgennen keıin Prezıdenttiń qalaǵan óleńin oqyp berdi. N.Nazarbaev onyń úsh kitabyn aldyrtqanyn da aıtty.
«Óleń jazǵan úsh kitabyńdy taýyp aldym», - dedi Memleket basshysy aqyn qyzǵa qarata aıtqan sózinde.
Maqpaldyń alǵashqy óleńderi - «Tolǵaýy toqsan týǵan til» jáne «Poezııa, menimen egiz be ediń?» oblystyq gazetterde jarııalandy. Bertin kele,»Alaqandaǵy baqyt» jınaǵyn shyǵardy. Sonyń óleńderi «Ómir órnekteri» men «Jas tolqyn» ulttyq toptamalarǵa endi.
Sondaı-aq, búgingi kezdesýge ánshi Klara Tólenbaeva da qatysty. Ol Prezıdentke baıanmen tanymal «Jibek sezim» ánin oryndap berdi.
Aıta keteıik, kezdesý kezinde QR Prezıdenti Nursultan Nazarbaev barsha analar men qyz-kelinshekterdi 8 Naýryz - Halyqaralyq áıelder kúnimen quttyqtady. "Ananyń qudireti sheksiz. "Onyń aldynda búkil dúnıe bas ıedi" dep tegin aıtylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtalyp, bitimge keletin bolǵanyn bilemiz. Dástúrimizdi barynsha saqtap kele jatqan biz áıel zatyn ásirese qadirleıtin xalyqpyz. Qazaq ulty qyz balany árýaqytta alaqanyna salyp, aıalap otyratyn. Bul saltymyz otbasy úshin buzylmas zańdylyqqa aınalyp keledi. "Ana" degen qasterli sózdi estigende tebirenbeıtin júrek joq, tolqymaıtyn kóńil bolmaıdy", - deıdi N.Nazarbaev. Memleket basshysy kópbalaly otbasylarǵa kómek berý máselesin qozǵady. Sondaı-aq, eki anaǵa anaǵa "Altyn alqa" men "Kúmis alqany" saltanatty túrde tapsyrdy. Prezıdent otbasynyń yntymaǵyn saqtaýdyń qupııasymen de bólisti.
