Prezıdent EQDB prezıdenti Odıl Reno-Bassomen kezdesti

ASTANA. KAZINFORM - Qasym-Jomart Toqaev Eýropalyq qaıta qurý jáne damý bankiniń prezıdenti Odıl Reno-Bassomen kezdesti, dep habarlaıdy Aqordanyń baspasóz qyzmeti.

Qasym-Jomart Toqaev pen Odıl Reno-Basso Qazaqstan men EQDB arasyndaǵy yntymaqtastyqtyń perspektıvasyn talqylap, álemdik ekonomıkanyń ózekti máseleleri boıynsha pikir almasty. 

Qarjy uıymymen baılanys ornatqannan beri elimiz shaǵyn jáne orta bıznes, energetıka, aýyl sharýashylyǵy sııaqty birqatar strategııalyq sektorda aıtarlyqtaı nátıjege qol jetkizgen.

Memleket basshysy Eýropalyq qaıta qurý jáne damý bankiniń birlesken jobalarǵa, sonyń ishinde «jasyl ekonomıka» baǵdarlamalaryn júzege asyrýǵa ınvestıtsııa quıý nıetin quptady.

Odıl Reno-Basso elimizdiń ınvestıtsııalyq áleýetine joǵary baǵa berip, qarjy ınstıtýty Qazaqstannyń ınfraqurylymdyq turǵydan damýyn odan ári qoldaýǵa múddeli ekenin málimdedi.

Onyń aıtýynsha, jaqynda uzyndyǵy 234 shaqyrym bolatyn Aqtóbe – Ulǵaısyn avtojolyn jańǵyrtýdy qarjylandyrý týraly sheshim qabyldanǵan. Bul baǵyttyń ishki jáne halyqaralyq tasymaldy damytýda mańyzy zor.

Odıl Reno-Basso EQDB men Qazaqstan yntymaqtastyǵy tabysty damyp kele jatqanyn aıtty.

Ol 2024 jyly ınvestıtsııa kólemi 2023 jylmen salystyrǵanda eki ese artqanyn, sonyń nátıjesinde 1 mıllıard eýroǵa jýyqtaǵanyn atap ótti. Budan bólek, bank basshysy Qazaqstannyń kólik áleýetin jáne energetıka sektoryn damytýǵa qoldaý kórsetýge daıyn ekenin rastady.

Osyǵan deıin Memleket basshysynyń Sheteldik ınvestorlar keńesiniń 37-shi plenarlyq otyrysyn ótkizgeni týraly jazdyq.