Premerdiń Almaty oblysy ákimine eskertýi: Qarjy tolyq ıgerilmese, qysqartamyz

ASTANA. KAZINFORM – Premer-Mınıstr Oljas Bektenov Almaty oblysynyń ákimi Marat Sultanǵazıevke bólingen qarajat tolyq ıgerilmese qysqartylatyndyǵyn eskertti.

Búgin Úkimet otyrysynda Premer-Mınıstr Almaty oblysynyń ákiminen: «Byltyr óńirge aýyldyq jerlerde 86 jobany iske asyrýǵa shamamen 21 mlrd teńge bólindi. Biraq, onyń tek 90 paıyzy ǵana ıgerilgen. Nege jumys baıaý júrip jatyr?» - dep suraǵan edi.

Óńir ákiminiń aıtýynsha, Almaty oblysy boıynsha «Aýyl – el besigi» jobasy aıasynda 2023 jyly 20,9 mlrd teńgege 86 jobany júzege asyrý josparlanǵan. Onyń 63 jobasy ótken jyly aıaqtalyp, 23 jobasy osy jylǵa aýysyp otyr.

«2024 jyldyń 1 qańtaryndaǵy derekke sáıkes, qarjyny ıgerý 18,6 mlrd teńgeni qurady. Igermeý kólemi – 2,3 mlrd teńge. Qarajattyń ıgerilmeý sebepteri kelesideı: 1,9 mlrd teńgege jumys kestesinen artta qalý (4 mekemege aıyppul salyndy), 290 mln teńge uzaqqa sozylǵan sot protsesteri (1 mekeme boıynsha), 164 mln teńge memlekettik satyp alý boıynsha únemdeý, 61 mln teńge qurylys materıaldarynyń qymbattaýyna baılanysty jobalyq-smetalyq qujattamany túzetý. Ótken jyly aıaqtalmaǵan jobalar bıyl júzege asyrylady. Jalpy, 2024 jyly 14,1 mlrd teńgege 84 jobany iske asyrý josparlanǵan. Nátıjesinde qurylys jáne jóndeý jumystary kelesi salalarda júrgiziledi: jol ınfraqurylymy, bilim berý, turǵyn úı kommýnaldyq sharýashylyq, mádenıet, densaýlyq saqtaý», - dedi Marat Sultanǵazıev.

Osy oraıda Úkimet basshysy bólingen qarajat tolyǵymen ıgerilýi tıistigin basa aıtty.

«Bólingen qarajat tolyǵymen ıgerilýi tıis. Bolmasa qysqartamyz. Osy jerde Qarjy mınıstri otyr. Durystap qarańyzdar», - dedi Oljas Bektenov.