Premer-lıga: «Qaırat» birinshi orynǵa kóterildi

ASTANA. KAZINFORM — Búgin fýtboldan Premer-lıga komandalary arasyndaǵy el birinshiliginiń 21-týrynyń alǵashqy oıyn kúni ótti.

Bul kúni Almatynyń «Qaıraty» óz alańynda Qyzylordanyń «Qaısaryn» qabyldady. 

Almatylyq klýb sońǵy eki týrda jeńiske jete almaı keledi. Aldymen Qostanaıdyń «Tobylymen» 2:2 esebimen teń tússe, odan keıin elordalyq «Astanaǵa» 0:1 esebimen jol berdi.

Bıyl júldeli orynnyń birine ıe bolýdy aldyna maqsat etken «Qaırat» úshin búgingi kezdesýde úsh upaı oljalaý mańyzdy edi. Oǵan qosa atalǵan qarsylasyna alǵashqy aınalymda 0:1 esebimen ese jibergen edi.

Kezdesý barysynda almatylyq fýtbolshylar tizgindi óz qolyna alýǵa tyrysty. Soǵan qaramastan birinshi kezeńde tablodaǵy esepke ózgeris engen joq. 

«Qaırat» sapynan Georgı Zarıa 86-mınýtta soqqan jalǵyz gol oıyn taǵdyryn sheshti.
Almatylyq klýb qarsylasynan 1:0 esebimen basym túsip, týrnır kestesinde birinshi orynǵa kóterildi.

Sondaı-aq alǵashqy oıyn kúninde «Atyraý» óz alańynda elordalyq «Jeńisten» 2:1 esebimen basym tústi. 

Endi 22 qyrkúıekte «Turan» (Túrkistan) men «Qyzyljar» (Petropavl), «Shahter» (Qaraǵandy) men «Elimaı» (Semeı), «Tobyl» (Qostanaı) men «Aqtóbe» jasyl alańǵa shyǵady.