Premer-lıga: «Astana» kósh basyndaǵy komandalarǵa jaqyndaı tústi

ASTANA. KAZINFORM - Elordalyq «Astana» fýtboldan Premer-lıga komandalary arasyndaǵy el birinshiliginiń keıinge qaldyrylǵan 22-týrdyń oıynynda Qaraǵandynyń «Shahterin» iri eseppen jeńdi.

Búgin elordalyq klýb Almatyda kósh sońynda kele jatqan «Shahter» komandasyn qabyldady. Oıyn barysynda olardyń sapynan Marın Tomasov 23-mınýtta esep ashsa, Djeffrı Chınedý 25, Nazmı Grıpshı 55-mınýtta mergendik tanytty.

Osylaısha «Astana» qarsylasynan 3:0 esebimen basym tústi. Nátıjesinde komanda týrnır kestesinde besinshi orynǵa kóterilip, birinshi orynda kele jatqan «Ordabasy» komandasyna jaqyndaı tústi.

Endi elordalyq klýb 20 qazanda syrt alańda Semeıdiń «Elimaı» klmandasymen kezdesedi.

Al 25 qazanda syrt alańda ÝEFA Konferentsııa lıgasynda Ýelstiń «Nıý-Seınts» klýbymen sheberlik baıqasady.

Eske salsaq, budan buryn Qazaqstan jastar quramasy Shotlandııadan basym tústi.