Preambýla naqty ári jan-jaqty jazylǵan — Indıra Rystına

ASTANA. KAZINFORM — Konstıtýtsııanyń preambýlasy naqty ári jan-jaqty jazylǵan. Bul týraly «Referendým-2026» onlaın marafony barysynda saıasattanýshy Indıra Rystına aıtty.

— Preambýlanyń ne ekenin jáne ony ómirde qalaı paıdalanýǵa bolatynyn qarapaıym túrde túsindirýge bolady. Máselen, mektep oqýshysy «biz kimbiz?» degen suraq qoısa, oǵan el ishinde de, shetelde de Konstıtýtsııanyń preambýlasyn kórsetý jetkilikti. Sebebi onda bizdiń tarıhymyzdyń bar ekeni, qandaı qoǵamda ómir súrip jatqanymyz jáne qandaı prıntsıpterge súıene otyryp, qandaı qoǵam qurǵymyz keletini naqty jazylǵan, — dedi ol.

Onyń aıtýynsha, preambýla tek kirispe mátin ǵana emes, eldiń ustanymdary men baǵyt-baǵdaryn aıqyndaıtyn bólim.

— Eń qarapaıym túrde aıtqanda, onda ádiletti Qazaqstan qandaı bolýy kerek, qandaı tártip pen qaǵıdattarǵa negizdelýi tıis ekeni kórsetilgen. Eger árbir bala osy ustanymdardy kishkentaıynan boıyna sińirse, onda Konstıtýtsııanyń talaptary da oryndalady degen sóz, ıaǵnı, preambýlada bizdiń basymdyq beretin prıntsıpterimiz anyq kórinis tapqan, — dedi Indıra Rystına.

Sarapshynyń sózinshe, ár eldiń preambýlasy mazmuny jaǵynan ártúrli bolǵanymen, máni uqsas.

— Qaı memleket bolsa da, preambýlada óziniń tarıhy, qaı baǵytta damyp kele jatqany jáne qandaı memleket qurǵysy keletini týraly aıtylady. Keıbir elder ony qysqa ǵana jazady, al keıbiri ańyzǵa uqsas keń túrde baıandaıdy. Al Qazaqstanda preambýla qarapaıym tilmen, tipti mektep oqýshysyna da túsinikti etip jazylǵan. Onda «biz qaıdan shyqtyq, biz qandaımyz jáne biz qaıda bara jatyrmyz?» degen negizgi suraqtarǵa naqty jaýap berilgen, — dedi ol.

Aıta keteıik, Kazinform agenttiginiń YouTube arnasynda «Referendým-2026» onlaın-marafony tikeleı efırde kórsetilip jatyr.