Praımerız: Qostanaı oblysynda eki kún ishinde 367 ótinim tústi

QOSTANAI. QazAqparat – Qostanaı oblysynda Nur Otan partııasynyń jańa formattaǵy ishki irikteýi – praımerızge qatysýshylardy tirkeý bastaldy, dep habarlaıdy QazAqparat.

Nur Otan partııasy Qostanaı oblystyq fılıaly tóraǵasynyń birinshi orynbasary Eldar Kúzenbaevtyń aıtýynsha, belsendi jáne bastamashyl azamattarǵa qoldaý kórsetý úshin óńirde arnaıy jobalar qolǵa alyndy. Sonymen qatar ol praımerızdiń aımaqta qalaı bastalǵany týraly aıtty.

«2019 jyly Nur Otan partııasy saıası keńesiniń keńeıtilgen otyrysynda Tuńǵysh Prezıdent – Elbasy usynǵan «Senim. Dıalog. Bolashaqqa nyq qadam» partııa jumysyn júıeli jańǵyrtý baǵdarlamasy iske qosyldy. Osy rette, elimizdiń saıası tarıhynda tuńǵysh ret praımerız, respýblıkalyq partııaishilik saılaý aýqymynda ótedi. Jańa formattaǵy ishki irikteýge Qostanaı oblysynan alǵashqy eki kúnde 367 úmitker usynylǵan. Praımerızdiń negizgi maqsaty – «Myqty kóshbasshy-kúshti partııa» qaǵıdaty boıynsha áleýetti kóshbasshylardy, eldiń damý máselelerin taldaýǵa buqarany keńinen tartý. Aımaqtarda júıeli jumys júrgizý úshin ózekti problemalardy anyqtaý. Úmitkerler praımerızge bastaýysh partııa uıymdary arqyly da, ózin-ózi usyný jolymen de qatysa alady», - dedi J.Kúzenbaev.

Aıta keteıik, QR Tuńǵysh Prezıdenti barlyq partııalastaryn praımerızge qatysýǵa shaqyrdy.

Elbasy atap ótkendeı, Nur Otan partııasy óz isiniń kásibı sheberlerin, bedeldi kóshbasshylardy, eldiń taǵdyryna jany ashıtyn adamdardy, sheshim qabyldaı alatyn jáne syndarly usynystar bere alatyn jańa tulǵalardy bılikke usynýdyń qaınar kózi bolýy qajet. Elimizdiń aldynda pandemııadan keıin ekonomıkalyq ósimdi qalpyna keltirý, jumys oryndaryn ashý, shaǵyn jáne orta bıznestiń jumysyn jandandyrý mindeti tur. Osynyń bári partııanyń saılaýaldy baǵdarlamasyna kirip, nurotandyqtardyń aldaǵy 5 jyl qyzmetine alǵyshart bolady.