Praımerız qorytyndysy: jastar reıtıngisinde kósh bastaǵan kimder

NUR-SULTAN. QazAqparat - «Nur Otan» partııasynyń partııaishilik praımerızi óz máresine jetti. Praımerız Qazaqstannyń aýyl-aımaqtary, aýdandarynda saıası úrdisti qalyptastyrýǵa múmkindik berdi. Sonymen qatar depýtattyqqa jastardyń, kópbalaly analar, volonterler, muǵalimder men dárigerlerdiń barýyna jol ashty. Praımerız Qazaqstanda saıası plıýralızmdi, jańasha saıası mádenıetti de qalyptastyryp jatqandaı. Bılikke jalyndaǵan jigerli jastardyń tikeleı aralasýyna da septigin tıgizdi. Tirkelgen úmitkerlerdiń 29 %-y – 35 jasqa deıingi azamattar osynyń aıǵaǵy.

Elbasy Nursultan Nazarbaev praımerız sabaqtastyqty saqtaı otyryp, partııa qataryn jańartýǵa múmkindik beretin áleýmettik lıftke aınaldy degen pikir bildirdi. «Biz aýqymdy partııalyq sharany birinshi ret ótkizdik. Partııa baqylaýyna alýy úshin kóptegen usynys-tilekter, máseleler aıtyldy. «Nur Otan» - naqty istiń partııasy. Bári mindetti túrde oryndalýy kerek», - dedi Elbasy.

Saıasattanýshy Erlan Saıyrovtyń aıtýynsha, praımerızde belsendik tanytqan azamattardyń ishinde óziniń pozıtsııasy bar, oıyn erkin ári ashyq aıta alatyn jastar barshylyq. Olar óz baǵdarlamalarynda dál qazir elde ýshyǵyp turǵan problemalardy sheshýdiń ońtaıly joldaryn usyna alǵan. Jastar – memlekettiń ekonomıkalyq jáne rýhanı damýynyń lokomatıvi. Jastardyń kózqarasynda jańashyldyq bar, kreatıvti oılaı alady. Olar elimizdiń damý jolynda eleýli úlesterin qosa alatynyn jan-jaqty kórsete alyp júr. Mundaı jastardy qoldaý qajet. Praımerız sondaı jastardyń saıası sahnaǵa ótýine múmkindik jasady. Elordada Praımerız nátıjesi boıynsha alǵa shyqqan 35 jasqa deıingi jastardyń kóshin Almaty aýdanynan qatysqan Baqdáýlet Jandildaev pen Baıqońyr aýdanynan Rasýl Medetov bastap tur. Alǵashqysy «Nur Otan» partııasynyń «Jas Otan» jastar qanatynyń jetekshisi bolsa, ekinshisi – QR sybaılas jemqorlyqqa qarsy is-qımyl agenttiginiń qyzmetkeri. Eki azamat ta elimizde jeń ushynan jalǵasyp turǵan sybaılas jemqorlyqqa qarsy kúreste kózge túsken tulǵalar. 22 jasar Jandildaev Máslıhatqa barýdy kózdese, 34 jasar Medetov QR Májilisine barýdy maqsat etken.

Elbasynyń jaqynda jaryqqa shyqqan «Abaı amanaty» atty maqalasynda dana Abaıdyń «talapty erge nur jaýar» degen qaǵıdasyn basshylyqqa alyp, 1958 jyly mektepti bitirgen boıda táýekelge bel baılap, Arqa tósine Temirtaýǵa attanǵany týraly jazdy.

«Jalǵa júr, jat jerge ket, mal taýyp kel» demep pe edi jaryqtyq Abaı daladaǵy qoı sońynda júrgen qazaq balasyna. Ondaǵysy «alys-jaqyn demeı, baratyn jerińe baryp, mańdaı ter, taban aqyń arqyly kásip úıren, nápaqańdy jı» degeni ǵoı. Biz qarshadaıymyzdan eńbekqor bolyp óstik. Qatarlastar bárimiz áke-sheshelerimizge qolǵabys etip, birge eńbekke aralasyp, shóp shaýyp, mal jaılap, otyn jaryp, jemis ósirip, baqsha salyp, jyldyń tórt mezgilinde úzilmeı kezektese kelip otyratyn sharýany atqarysyp, qara jumysqa ábden tóseldik. Keıin týǵan jerden shalǵaıdaǵy Temirtaýda, «Karmetkombınattaǵy» ot-jalynda balqyǵan bolattyń ortasynda quryshtaı shyńdaldyq, - dep jazdy ol.

Nazarbaevtyń osy tujyrymyn jastardyń qoldaıtyny ańǵarylady. Memleket qazaq jastary úshin túrli jobalar, oqý granttary, kadrlyq rezerv sııaqty múmkindikterdi berip júr. Sonyń birin qaldyrmaı paıdasyna asyryp, el ıgiligi úshin qyzmet atqaryp júrgen QR Sybaılas jemqorlyqqa qarsy is-qımyl agenttigindegi departament dırektory Rasýl Medetov keshegi Praımerızde 35 jasqa deıingi jastardyń ishinde kósh bastady.

Rasýl Medetov Batys Qazaqstan oblysynyń týmasy. Dárigerlerdiń otbasynda dúnıege kelgen. Ony ósirip jetkizgen anasy – balalar dárigeri.

Ol Elbasynyń jastardy qoldaýǵa arnalǵan sátti jobalarynyń biri «Bolashaq» baǵdarlamasymen Ulybrıtanııanyń Sheffıld ýnıversıtetinde memlekettik basqarý mamandyǵy boıynsha bilim alǵan. Elbasynyń «jastar óńirlerge baryp qyzmetke aralasý kerek» degen tujyrymy aıasynda, Qazaqstannyń birqatar aımaǵynda Aqtóbe, Atyraý, Oral, oblystarynda jáne Almaty qalasynda memlekettik qyzmette bolyp, nátıjeli qyzmet atqara bildi. Memlekettik qyzmette qarapaıym mamannan departament basshysyna deıin «ósti». Prezıdent Qasym-Jomart Toqaevtyń mańyzdy bastamalarynyń biri – Prezıdenttik kadr rezervine de endi. Memlekettik qyzmette úzdik nátıjelerge jetken Medetov rezervke ótý arqyly memlekettik laýazymdarǵa – basqarý laýazymdaryna ózi bilimimen taǵaıyndaldy. Ol áleýmettik teńsizdikti joıý, Qazaqstandaǵy kedeıshilik, jalaqyny bıýdjet qyzmetkerlerine birdeı kóterý, qyzmetkerlerdiń baspana máselesin sheshý, dekrettik demalystaǵy analardyń balasy 3 jasqa tolǵansha járdemaqy alýy sııaqty mańyzdy máselerdi kóterdi.

Bıýdjettik mekeme qyzmetkerlerdiń baspana máselesi men jalaqysynyń kóterilýine erekshe ekpin qoıǵan Rasýl Medetovtyń aıtýynsha, ol aıadaı ǵana jataqhananyń bólmesinde ósken. Memlekettiń qoldaýymen dárigerlerge beriletin nesıelik baspana-bir bólmeli páterge qol jetkizgende ol tórtinshi synypta oqypty. Anasynyń jalǵyz jalaqysynyń jartysy jyldar boıy osy úıdi óteýge jumsalǵan. Osy bir bólmeli páterde Rasýl Medetov úılenip, anasy qudalyq ótkizip, úı bolyp, balaly boldy. Qoǵamda basqarý isinde jetistikke jetkender tek tanysy nemese «salmaqty» kókesiniń yqpal etýimen júr degen pikir qalyptasqan. Rasýl Medetovtyń jaǵdaıynda kerisinshe. Ol halyq arasynan shyqqan qarapaıym azamat, bilimge umtylysy men memlekettiń jastar úshin bergen múmkindikteriniń arqasynda jetistikke jetkenin aıta ketý kerek.

Depýtattyqqa irikteýde osyndaı jastardyń kózge túskeni qýantady. Іrikteýdiń kelesi kezeńderi aldaǵy ýaqytta. Eldiń zań shyǵarý isine Rasýl Medetovteı oıy tereń, birneshe tildi erkin meńgergen, óz tilinde erkin sóıleıtin, Qazaqstan men shetelde basqarý jáne quqyqtyq bilimin alǵan, tájirıbesin kórgen belsendi jastardyń aralasýy Qazaqstan damýynyń jańa kezeńine shyǵaratynyna senim uıalatady.