Poıyz bıletterin satý erejeleri ózgerdi

ASTANA. KAZINFORM — Kólik mınıstriniń 2025 jylǵy 11 sáýirdegi buıryǵymen temirjol kóligimen jolaýshylardy, bagajdy, júk jáne poshta jóneltilimderin tasymaldaý qaǵıdalaryna ózgerister engizildi. Buıryq bıyl 22 sáýirden bastap kúshine enedi. 

Poıyzdarǵa bılet satý merzimderi:

Jolaýshylar poıyzdaryna — poıyz jóneltilgenge deıin keminde 45 táýlikten 10 mınýtqa deıin (buryn 45 táýlikten 1 táýlikke deıin edi). Uıymdasqan jolaýshylar tobyna ótinishter bul tártipke kirmeıdi;

Qala mańy poıyzdaryna — jóneltilýge deıin 10 táýlikten 10 mınýtqa deıin (buryn 10 táýlikten 1 táýlikke deıin edi).

Bıletterdi satý jolaýshylar poıyzdaryna jóneltilýden 45 táýlik buryn Astana qalasynyń ýaqyty boıynsha saǵat 07:00–den bastap júrgiziledi.

Múgedektigi bar adamdarǵa arnalǵan arnaıy kýpelerge bıletterdi satý tártibi:

Bıletterdi satý ashylǵan sátten bastap arnaıy kýpege kelesi sanattaǵy adamdarǵa jáne olardyń alyp júrýshilerine tek bılet kassalarynda resimdeledi:

júrip-turýy qıyn, kómekshi quraldardy paıdalanatyn (taıaq, baldaq, múgedek arbasy jáne t. b.) I toptaǵy múgedektigi bar adamǵa;

múgedek balaǵa (18 jasqa deıin);

medıtsınalyq uıymǵa (nemese odan) jedel saparmen bara jatqan adamǵa.

Poıyzdyń jóneltilýine 7 táýlik qalǵanda bıletter kelesi adamdarǵa resimdeledi:

múgedektigi bar adam men múgedek balaǵa — múgedektik mártebesin rastaıtyn qujattardy usynǵan jaǵdaıda;

medıtsınalyq uıymǵa jedel saparmen bara jatqan adamǵa — medıtsınalyq mekemeniń sapardyń qajettiligin rastaıtyn qujatymen;

alyp júrýshi adamǵa — jolaýshynyń qujattaryn usynǵan jaǵdaıda.

Bir kýpede 4 orynǵa deıin bılet satyp alýǵa bolady.

Bılet resimdeý tásilderi:

avtomattandyrylǵan basqarý júıesinde (ASÝ);

fıskaldandyrylǵan kompıýterlik júıede;

dıspetcherlik termınal (DTM), ózin-ózi qyzmet kórsetý termınaldary arqyly;

ınternet-resýrstar men jolaýshylar poıyzyndaǵy jolserik arqyly;

jolaýshynyń bir qujaty negizinde elektrondyq jol júrý qujatyn berý arqyly.

Qala mańy poıyzdaryna bılet satyp alǵanda kelesi derekter kórsetilýi tıis:

tegi, aty, ákesiniń aty (bar bolsa);

JSN;

jolaýshy qujattarynyń biriniń nómiri.

Bılet satyp alý úshin jaramdy qujattar:

QR azamatynyń pasporty nemese jeke kýáligi;

QR aýmaǵyndaǵy sheteldikterdiń turýǵa ruqsaty;

azamattyǵy joq adamnyń kýáligi;

bosqyn kýáligi;

QR dıplomatııalyq nemese qyzmettik pasporty;

teńizshiniń jeke kýáligi;

sheteldik pasport;

qaıtarý kýáligi (eger basqa eldiń azamaty QR aýmaǵynda qujat joǵaltqan jaǵdaıda);

týý týraly kýálik (16 jasqa deıingi balalarǵa);

áskerıler úshin áskerı bılet.

Buryn qoldanylǵan ýaqytsha jeke kýálik negizinde bılet satyp alý múmkindigi alynyp tastaldy.

Jeńildikpen nemese tegin bılet alý úshin — jeńildik quqyǵyn rastaıtyn qujat usynylýy qajet.

Jeńildikter mólsheri:

áleýmettik mańyzy bar baǵyttarda — jol júrý qunynyń 50%;

kommertsııalyq baǵyttarda — tasymaldaýshynyń qalaýy boıynsha.

Barlyq múgedektik toptary men múgedek balalarǵa (18 jasqa deıin);

I, II toptaǵy múgedekter men múgedek balalardy alyp júretin adamdarǵa.

Alyp júrýshige bılet tek kelesi shartpen beriledi:

jeńildikpen bılet tek bir vagonǵa jáne bir baǵytqa resimdelgen kezde;

múgedek adamǵa jeńildikpen bılet resimdelgende bir ýaqytta ǵana;

eger múgedek adamnyń bıleti qaıtarylsa, birge resimdelgen jeńildikpen bılet te qaıtarylady;

alaıda alyp júrýshiniń bıletin jeke qaıtarýǵa jol beriledi.

Jańa norma:

eger múgedektigi bar jolaýshy sapardan bas tartsa, alyp júrýshi adamǵa otyrǵyzýǵa ruqsat berilmeıdi.

Uıymdasqan jolaýshylar toptaryna qatysty:

toptan (balalardan) jazbasha ótinish keminde 45 táýlik jáne jóneltilýden 3 táýlikten keshiktirmeı berilýi kerek;

qolma-qol emes tólemmen — 6 táýlikten keshiktirmeı;

eger ótinish 6 táýlikten az ýaqyt ishinde berilse — tólem tek qolma-qol, 1 táýlik ishinde, biraq 3 táýlikten kesh emes.

Qala mańy poıyzdarynda qol júgin tasymaldaý:

(joǵary jaılylyqtaǵy elektropoıyzdardan basqa) júk retinde: balalar arbasy, motorsyz bólshektelgen velosıped, ósimdikter men kóshetter (bıiktigi 180 sm-den aspaýy tıis).

Júk retinde tasymaldanatyn bólinbeıtin zattar:

salmaǵy 500 kg deıin (gaz plıtasy, tońazytqysh, pallet, jabdyqtar, qozǵaltqyshtar, stanoktar), júk aýystyrmaı.

Júk tasymaldaý baǵasyn tasymaldaýshy belgileıdi.

Bılet qunyn tolyq qaıtarý jaǵdaılary:

poıyzdyń reısi bılettiń ózinde kórsetilgen poıyzǵa toqtatylǵan bolsa;

poıyz 1 saǵattan artyq keshikse;

bılettegi oryn berilmegen jaǵdaıda (jolaýshy basqa orynnan bas tartqan jaǵdaıda).

Temir joldyń kinásinen kelisilgen poıyz keshikse:

jol júrý quny men barlyq alym tolyq qaıtarylady;

qaıtarý operatsııasy úshin komıssııa ustalmaıdy.

Jolaýshylar poıyzy keshikkeni úshin aıyppul:

bılet qunynyń 3%-y árbir keshigý saǵatyna, biraq bılet qunynan aspaıdy;

vokzal qyzmetkerleri toltyratyn akt men jolaýshynyń ótinishi negizinde tólenedi;

ótinish berý merzimi — 6 aı.

Balalarmen sapar shegý erejeleri:

7 jasqa deıingi bir bala — tegin, eger jeke oryn almaıtyn bolsa;

oryn qajet bolsa — jeńildikpen bılet satyp alynady;

eger 7 jasqa deıingi balalar sany birden kóp bolsa — qalǵan balalarǵa jeńildikpen bılet satyp alynady;

7–15 jas aralyǵyndaǵy balalar — 50% jeńildikpen;

15 jastan joǵary — eresek bılet;

balanyń jasy sapar bastalar kúnge baılanysty anyqtalady;

jasy rastalatyn qujat mindetti túrde kórsetilýi tıis.

Kámeletke tolmaǵan balany alyp júretin eresek adam:

zańdy ókili bolmasa — notarıaldy rastalǵan senimhat usynýy qajet (qaǵaz nemese tsıfrlyq túrde);

senimhatsyz bala poıyzǵa otyrǵyzylmaıdy;

eger zańdy ókili poıyzda birge bolsa — senimhat qajet emes.

15 jastan asqan balalar eresek adamnyń qaraýynsyz júre alady:

notarıaldy rastalǵan jazbasha kelisimimen, (qaǵaz nemese tsıfrlyq nusqada).

Taıaýda elimizde poıyz bıletin kimder jeńildikpen satyp ala alatyny týraly jazǵan edik.