Polshada ortaǵasyrlyq rytsardiń zıraty tabyldy
ASTANA. KAZINFORM — Polıak arheologteri Gdansk qalasynyń qaq ortasynda erekshe oljaǵa tap boldy. Jergilikti halyq tabylǵan jaýyngerdi dereý «gdansktik Lanselot» dep atap ketti, dep habarlaıdy euronews.
Ortaǵasyrlyq jerleý orny Sýkennıtsa men Grodzka kósheleriniń qıylysynda, aýqymdy arheologııalyq qazba jumystary kezinde tabylǵan. Bul jumystar 2023 jyldan beri jalǵasyp keledi.
2025 jyldyń shilde aıynda ArcheoScan toby XIII ǵasyrmen datalanatyn rytsar beınelengen qabirtas tapqan. Eki kúnnen soń, dál sol qabirtas astynan jaqsy saqtalǵan rytsardiń qańqasy shyqqan.
Rytsar shamamen 40 jasta bolǵan. Onyń boıy 168–178 sm shamasynda bolǵan kórinedi — ol zamanda bul óte bıik kórsetkish. Onyń qabirtasy qymbat Gotland áktastarynan jasalǵan. Al syrtynda saýyt, qylysh jáne qalqany bar rytsar beınelengen. Arheologterdiń aıtýynsha, bul adamnyń qarapaıym azamat bolmaǵany anyq.
Tarıhqa kóz júgirtsek, XIII ǵasyrda Gdansk (burynǵy Dantsıg) Tevton ordeniniń bıliginde bolǵan. Alaıda keıbir ǵalym bul rytsar XI–XII ǵasyrlarda bılik etken Sobeslavtar áýletiniń ókili bolýy múmkin dep sanaıdy.
Sonymen qatar qazba kezinde 1140 jylmen datalanatyn aǵash shirkeý, ortaǵasyrlyq kóshe bólikteri, 1335–1341 jyldary salynǵan tevtondyq qamaldyń qaldyqtary tabyldy. Bul qamaldy 1454 jyly jergilikti turǵyndar qıratqan.
Arheologter tabylǵan qańqany ári qaraı zerttep, rytsardiń shyǵý tegi men ómirlik tarıhyn anyqtaýǵa tyrysady.
Budan buryn kanadalyq energetıkalyq kompanııa Baltyq teńizinde iri kómirsýtek qory bar ken ornyn anyqtady.