Polıtsııa pavlodarlyq áıeldiń qymbat kóligin órtegenderdi qolǵa túsirdi
PAVLODAR. KAZINFORM - Pavlodarlyq polıtseıler túngi ýaqytta Toyota Land Cruser 200 markaly avtokólikti órtegen azamat pen oǵan tapsyrys bergen adamdy ustady. Qazirgi ýaqytta sotqa deıingi tergeý bastaldy.
Oqıǵa osy jazda Pavlodar qalasynda bolǵan. Túngi ýaqytta áldebireý áıel adamǵa tıesili Toyota Land Cruser 200 markaly avtokólikti ádeıi órtegen.
Jedel-izdestirý is-sharalaryn júrgizý barysynda pavlodarlyq jedel ýákilder jol talǵamaıtyn avtokólikti órteýge qatysqan adamdardy anyqtady.
- Pavlodar turǵyny aqshalaı syıaqy úshin bul qylmysty aldyn ala uıymdastyryp, josparlaǵany anyqtaldy. Ol Almaty qalasynan kelgen azamatqa avtokólikti órteýdi usynǵan. Al ol kelisip, tez tutanatyn suıyqtyqty paıdalanyp, Maıra kóshesindegi úıdiń turaǵynda avtokólikti órtep jiberedi. Keıin qylmys ornynan qashyp ketken,-dep túsindirdi oqıǵanyń mán-jaıyn Pavlodar oblysy polıtsııa departamenti krımınaldyq polıtsııa bastyǵy Balǵabaı Qaparov
Kúdiktiler ustaldy. Qazirgi ýaqytta bótenniń múlkin qasaqana joıý faktisi boıynsha sotqa deıingi tergeý júrgizilip jatyr.
Eske sala keteıik, Pavlodarda ákim syılaǵan ishimdikke toıyp alǵan er adam úıin de, áıelin de órtep jiberdi.
