Polıtsııanyń jemqorlyq jasaýyna jol ashatyn normalar áli de bar - Marat Ahmetjanov

ASTANA. QazAqparat – Іshki ister mınıstri Marat Ahmetajanov QR Prezıdenti teleradıokesheniniń «Úsh suraq» baǵdarlamasynda saqshylardyń arasyndaǵy jemqorlyqty joıý úshin qandaı sharalar qolǵa alynyp jatqanyn baıandady, dep habarlaıdy QazAqparat tilshisi.

«Áýeli zań normalaryndaǵy jemqorlyq táýekelderdi joıý qajet. Búginniń ózinde tsıfrlyq qaltarystar bar. Ol qaltarystar bopsalaýǵa, zańsyz jolmen baıýǵa, qyzmet jaǵdaıyn teris maqsatqa paıdalanýǵa jol ashady. Osy olqy tustardy japsaq, ishki ister qyzmetkerleriniń sanasy da ózgeredi», - dedi mınıstr.

Onyń paıymynsha, saqshylardyń qataryn jemqorlardan tazartýdyń birden-bir joly – olardyń áleýmettik jaǵdaıyn jaqsartý.

«Eńbekaqyny kóterý bizge saqshylar sapyna laıyqty mamandardy irikteýge múmkindik beredi. Qazir bizdiń polıtsııa qyzmetkerleri zańnan attasa, biraz ıgilikten aırylýy múmkin. Memleket basshysy birneshe ret qamqorlyq tanytyp, eńbekaqysyn ósirip jatyr. Odan bólek, jergilikti atqarýshy organdar kúni-túni qoǵam tártibin kúzetip júrgen patrýldik bekettegi qyzmetkerlerge qosymsha syıaqylar belgileıdi. Sondyqtan, bizdińshe, búginde áleýmettik jáne ózge de artyqshylyqtar polıtsııadaǵy qyzmetti tartymdy etedi», - dedi Marat Ahmetjanov.

Vıdeodan alynǵan kadr