Polıtsııa podpolkovnıgi Ǵalııa Ábildına: Túsken ortań tárbıelep alady
Búginde Ǵ. Ábildına oblystyq PD Aqparattyq-taldaý qyzmeti bastyǵynyń orynbasary. Quqyq qorǵaý organyndaǵy óz mansabyn qatardaǵy mılıtsıonerden bastaǵan. Al oǵan deıin balabaqshada ádisker bolyp jumys istegen.
«Meniń ata-anam gýmanıtarlyq maman ıeleri: ákem-jýrnalıst, anam-pedagog. Anam pedagogıkalyq joldy tańdaǵanymdy qalady. Mektepten keıin pedagogıka ınstıtýtyn bitirip, mamandyǵym boıynsha eńbek ettim. Bir kúni Jańaarqa aýdany ІІB tergeýshisi bolyp qyzmet etetin aǵam: «Organǵa bar, bizge tártipti, jaýapty qyz qajet», - dedi. Mılıtsıoner qyzmetinen habardar bolǵan edim. Sebebi aǵam tergeýshi, taǵy bir aǵalarym - ýchaskelik ınspektor, OBHSS (Sotsıalıstik menshikti tonaýmen kúreske qarsy bólim) qyzmetkeri boldy», - deıdi ol.
Forma kıgennen keıin Ǵalııany «Qıyndyqtarǵa tótep bere alam ba?», «Jaýapkershilikti aqtaı alam ba?» degen syndy san-túrli saýal mazalaǵan. Degenmen, ol aýyrtpalyqtyń barlyǵyn ótkergen.
Ǵ. Ábildına Jańaarqa aýdandyq ishki ister bólimine jumysqa qalaı ornalasqanyn eske aldy.
«Maǵan ІІB ǵımaraty unamady - birtúrli, sur boldy. Esiktiń tutqasyn bastym, ashylmady. Sodan buryldym da ketip qaldym. Maǵan úıge qońyraý shalyp: «Seni ІІB-da kútip otyr», - dedi. Qaıta bardym. Sodan beri meniń ómirim quqyq qorǵaý organdarymen baılanysyp ketti. Jańaarqa aýdandyq ІІB-de qupııa qujattarmen jumys istedim. Maǵan alǵashqy kezde tájirıbeli qyzmetkerler kómektesti, olar – meni kóp nársege úıretken tamasha adamdar», - deıdi polıtseı.
Ol áli kúnge deıin óziniń alǵashqy tálimgerlerin rızashylyqpen jáne jylylyqpen eske alady. Kórsetken qoldaýlary men qamqorlyǵyna áli kúnge rıza.
«Túsken ortań seni tárbıeleıdi, ózińdi jaqsy sezinýge beıimdeıdi. Men zańdy tańdadym. Bul turǵyda ákemniń kitaphanasy kóp kómektesti – óz ýaqytynda kitaptardy bas kótermeı oqydym. Qazir de oqımyn – sońǵy ýaqytta psıhologııaǵa qyzyǵýshylyq tanytýdamyn. Bos ýaqytymda kitappen ońasha qalýdy jaqsy kóremin. Kitapty elektrondy túrde oqýǵa bolmaıdy», - dep keńes berdi ol.
Ǵalııa Ábildına tergeý ızolıatorynda da qyzmet etken. Al 2002 jyly Qaraǵandy oblysy Іshki ister departamenti aqparattyq-taldaý qyzmetine aýysyp, ekinshi bilim aldy. Qazir Qaraǵandy oblysy Polıtsııa departamenti Aqparattyq-taldaý qyzmeti bastyǵynyń orynbasary polıtsııa podpolkovnıgi Ǵalııa Qalıaqparqyzy Abıldına jas qyzmetkerlerge úlgi jáne tálimger.
«Maqsatym - olarǵa óz tájirıbemdi jetkizý. Olardyń jumysy kórinbeıdi. Biraq nátıje ákelý úshin zańdy turǵyda saýatty bolý qajet. Maǵan oqytý unaıdy. Bizdiń qyzmetimiz qosalqy bolsa da, qyzyqty. Qylmysty ashýǵa ýchaskelik polıtsııa ınspektorlaryna, tergeýshilerge, jedel qyzmetkerlerge, ıývenaldyq polıtsııa qyzmetkerlerine kómek kórsetemiz», - deıdi polıtsııa podpolkovnıgi Ǵ. Ábildına.
