«Polıtsııa maıory esirtki satsa, esirik bolmaǵan nemiz qalady?» - BAQ-qa sholý
***
«Egemen Qazaqstan» basylymynyń jazýynsha, Soltústik Qazaqstan óńirinde estigen jannyń jaǵasyn ustatar oqıǵa oryn aldy. Oblystaǵy Qyzyljar aýdanynda polıtsııa maıory esirtki saýdasy kezinde qolǵa tústi. Oblystyq prokýratýranyń málimeti boıynsha, atalmysh polıtsııa qyzmetkeri 2013 jyldyń 15 aqpanynan 14 naýryzyna deıin óziniń qyzmet babyn paıdalanyp, birneshe márte esirtki zattaryn - aıryqsha iri kólemdegi geroındi satyp kelipti. Onyń jalpy salmaǵy 6,48 gramdy quraǵan. Sáýirdiń 3-i kúni derekteri ábden jetkilikti dárejege jetken Ulttyq qaýipsizdik komıtetiniń oblystyq departamenti Qyzyljar aýdandyq ishki ister bóliminiń aǵa jedel ókiline qatysty qylmystyq isti de qozǵady. Bul materıal «Polıtsııa maıory esirtki satsa, esirik bolmaǵan nemiz qalady?» degen taqyryppen berilgen.
«Kentaý qalasyna qarasty Búrgem aýylynyń turǵyny Zıba Erǵaraeva, qudaı qalasa, bıylǵy jyldyń 1 maýsymy kúni 108 jasqa tolady. Qazirgi kezde ájeıdiń densaýlyǵy jaqsy. Nemereleriniń betinen súıip, aldyna alyp, oınatyp otyrady. Tek eki kózdiń nashar kóretindiginen taıaqqa súıenedi»,-dep jazady «Egemen Qazaqstan» «104 jasynda tólqujatyn aýystyrdy» atty materıalda. Zıba ájeı 1905 jyly Túrkistan qalasynda týǵan. Sodan jubaıy Beısenbek ekeýi qoı baǵýdy kásip etip, kúndelikti kúıbeń tirshilikti bastan ótkeredi. Ul-qyzdarynyń qolqa salýymen 1975 jyly Kentaý qalasyna qonys aýdarady. Jeke sáıkestendirý nómiri joq bolǵandyqtan, 104 jasynda ájeı tólqujatyn aýystyrdy. «Merzimi ótip, zeınetaqysyn ala almaǵan soń, osylaı isteýge týra keldi», - deıdi Aısulý esimdi kelini.
***
«Aıqyn» gazetiniń jazýynsha, Aqordada Elbasy Nursultan Nazarbaev Qaýipsizdik keńesiniń otyrysyn ótkizdi. Jıynda eń aldymen, Qazaqstannyń azyq-túliktik qaýipsizdigin nyǵaıtý máselesi qaraldy. Sodan keıin «kún tártibine» sáıkes, elimizdegi ǵarysh salasyn damytýǵa baǵyttalǵan sharalar talqyǵa salyndy. Otyrysty ashqan Prezıdent azyq-túliktik qaýipsizdikti qamtamasyz etýge kúsh salýdyń mańyzdylyǵyn atap ótti. Elbasynyń aıtýynsha, tamaq ónimderiniń quny jaǵynan da, san alýan túrleri boıynsha da halyqqa qoljetimdi bolýy úshin sharalar qabyldaý kerek. Bul jaıynda tolyq bilgińiz kelse, «Tamaq ónimderiniń quny qoljetimdi bolýy kerek» atty maqalany oqyńyz.
«Elimizdegi birqatar BAQ «Almatyda 50-den astam kósheniń ataýy ózgertiledi. Kóshelerdiń ataýyn aýystyrý úshin memlekettik bıýdjetten qyrýar qarjy jumsalady» degen alyp-qashpa aqparat taratty. Biz osy máseleniń anyq-qanyǵyn bilý maqsatynda Almaty qalalyq ákimshiligi Tilder basqarmasynyń onomastıka jónindegi bóliminiń mamandarymen tildesken edik»,-dep jazady «Aıqyn». Resmı derekke júginsek, Almatyda eki myńǵa jýyq kóshe bar kórinedi. Osy kóshelerdiń 158-niń ataýy el táýelsizdiginiń alǵashqy jyldarynda ózgertilipti. Sondaı-aq 458 kóshege jańa ataý berilipti. Almaty qalalyq ákimshiligi Tilderdi damytý, muraǵattar jáne qujattama basqarmasy onomastıka bóliminiń bastyǵy Ótepbergen Qalabaıdyń aıtýynsha, qala aýmaǵynda sonaý keńestik kezeńdegi ataýymen áli kúnge kele jatqan 100-ge jýyq kóshe bar eken. Degenmen dál osy kóshelerdiń ataýynyń basym kópshiligi áldeqashan eskirgen. Bul maqala kópshilik nazaryna «Almatyda 60 kóshe qashan ózgertiledi?» degen taqyryppen usynylyp otyr.
***
«Alash aınasy» basylymynyń «Býdan býda-býda aqsha jasaıtyndar býlyǵyp júr» maqalasynda elimizdegi kalıan ındýstrııasynyń halyq densaýlyǵyna tıgizip jatqan orasan zor zııany týraly aıtylǵan. Al múddeli jaq «Qazaqstan kalıan ındýstrııasy kásipkerler qaýymdastyǵyn» quryp, dástúrimizde joq nárseni mádenıetke balap, shyǵys elderiniń sánine sanap, ýly tútinge shań jýytar emes.
Sonymen qatar osy gazettegi «Shendiler nege «jeýge» qumar?» atty materıalda elimizdegi jemqorlyq deńgeıi ekonomıkalyq qana emes, ulttyq qaýipsizdikke de qater tóndiretin deńgeıge jetip otyrǵandyǵy saraptalǵan.
